Májilis depýtaty zańsyz shyǵarylǵan aktıvterdi qaıtarǵandardyń jaýapkershiligi týraly pikir bildirdi
«Eger aktıvterdi erikti túrde qaıtarsa, onda tıisti shart jasalady. Oǵan sáıkes aktıvteri zańsyz dep tanylǵan adam múlikti qaıtarý mindetin oryndaıdy. Bul jaǵdaıda oǵan qatysty qylmystyq qýdalaý toqtaıdy. Eger óz erkimen qaıtarsa, odan ári qýdalaý bolmaıdy. Bul qadamdar aktıvterdi erikti túrde qaıtarý týraly kelisimniń sharty bolady», - dedi S. Imasheva Májiliste tilshiler suraǵyna jaýap bere otyryp.
Sonymen qatar, tilshiler depýtattan zańsyz shyǵarylǵan aktıvterdiń qaı bóligin qaıtarý mejesi qalaı belgilenetinin surady.
«Muny depýtattardyń men Úkimettiń qatysýymen qurylatyn komıssııa sheshedi. Máselen, tutas qaıtarý protsesi júrgen kezde, jumys istep turǵan kásiporynnyń jaǵdaıy nasharlaýy múmkin. Al eger bankke qatysty bolsa, onda depozıtter men kapıtal jappaı shyǵarylýy yqtımal. Bul óz kezeginde ekonomıkamyzǵa odan ári keri áser etedi. Jalpy, memlekettiń ekonomıkalyq jáne áleýmettik jaǵdaıyna eleýli túrde yqpal etetin aktıvter bar», - dedi depýtat.
Onyń aıtýynsha, bul máselege qatysty tıisti sheshimdi komıssııa jasaıdy.
«Keıbir nysandardyń jumysyn qazirgi ıesi odan ári jalǵastyra bergeni de durys bolady, sebebi qaıtarý protsesi kezinde ekonomıka úshin aýyr saldar bolýy múmkin. Atap aıtqanda, bul másele bankke qatysty. Bankte problema bar ekeni jarııalansa, birden depozıtter shaǵyralatyny anyq. Osynyń saldarynan kredıtorlar qarjylandyrýdy toqtatsa, bul jaǵdaı qarjy júıemizdiń turaqsyzdyǵyna ákeledi. Bul turǵyda komıssııa aktıvti qaıtarý qadamdaryn jan-jaqty pysyqtaıdy», - dedi S. Imasheva.
Jaqynda Parlament Májilisi zańsyz shyǵarylǵan aktıvterdi memleketke qaıtarý týraly zań jobasy men birneshe ilespe qujatty talqylaıdy.