Májilis depýtaty Túrkistan jastarymen kezdesti

TÚRKІSTAN. QazAqparat - Parlament Májilisiniń depýtaty Qaırat Balabıev Túrkistan qalasyndaǵy «Jeńis» saıabaǵynda jastarmen kezdesý ótkizdi, dep habarlaıdy QazAqparat.

Basqosýda depýtat Parlament qabyrǵasynda qabyldanyp jatqan zań jobalarynyń mán-mańyzyna toqtalyp, jastardy el ıgiligi jolynda adal qyzmet etýge shaqyrdy.

«Qashan da adal eńbektiń nany tátti. Taza eńbekpen tabysqa jetken adamnyń kúndiz kúlkisi, túnde uıqysy tynysh bolady. Tynymsyz eńbek telegeı tabysqa jetkizedi. Jastar jastyq shaqta bilim alyp, til úırenip, jan-jaqty jumys istep úırense, jalqaýlyqqa jol bermeıdi. Mamandyq tańdaýda jańylmaý kerek. Qıyndyqtardy sabyrmen jáne tabandylyqpen jeńýge tyrysqan jón», – dedi Q.Balabıev.

Depýtattyń aıtýynsha, búginde jastardyń zor jetistikterge jetýi úshin múmkindik mol. Ásirese, memleket tarapynan jastardy qoldaýǵa baǵyttalaǵan baǵdarlamalar men jobalar jeterlik. Qaırat Balabıev solardyń bir sypyrasyn túsindirip berdi.

«Óńirlerde bilimdi, bilikti, ójet jastarymyz kóp. Olar oblystarda, aýdandarda qalyp qoıyp jatady. Biz sondaı jastardy tartyp, memleket deńgeıinde qyzmet atqarýǵa jol ashýymyz kerek. Buǵan «AMANAT» partııasy da atsalysyp keledi. Jastardy qoldaý – bizdiń basym baǵytymyz», – dedi Májilis depýtaty.