Májilis depýtaty salyq jınaý deńgeıine pikir bildirdi
«Bıýdjetti josparlaý men atqarýdyń keıbir ózekti problemalaryna toqtalǵym keledi, al úkimet óziniń aldaǵy jumysynda olardy eskerýi kerek.
Birinshiden, salyq jınaý deńgeıi áli de tómen. 2020 jyly bıýdjettiń salyqtyq túsimderi 17,4 paıyzǵa azaıdy. 2021 jylǵy 1 qańtarǵa bıýdjetke jalpy bereshek 378 mlrd teńgeni qurady. KTS (korporatıvtik tabys salyǵy) avanstyq tólemi 79,9 mlrd teńgeni nemese 2020 jylǵy jeltoqsanda bıýdjetke túsken, KTS túsiminiń 18,5%-yn qurady. QQS boıynsha jalpy debıttik saldo 1,6 trln teńgeden asty. Joǵaryda atalǵan osy problemalardyń barlyǵy «Salyqtyq ákimshilendirý júıesin reformalaý» baǵdarlamasy aıasynda sheshilýge tıis edi. Osy baǵdarlamany iske asyrýǵa 11 jyl ishinde, mıllıardtaǵan teńge jumsaldy. Sonda nátıje qandaı?», - dedi depýtat Úkimet pen Esep komıtetiniń 2020 jylǵa arnalǵan respýblıkalyq bıýdjettiń atqarylýy týraly esepterin qaraý kezinde.
Onyń aıtýynsha, Memlekettik kiris komıtetiniń 16 aqparattyq júıesinen 12 júıesi aqparattyq qaýipsizdik talaptaryna saı kelmeıdi, onyń ishinde 9-y paıdalanýǵa engizilmegen. Nátıjesinde, salyqtyq jáne kedendik jumysty jaqsartýdan, tek 2020 jyldyń ózinde ǵana túsetin 1,5 trln teńge mólsherindegi qosymsha túsimder túsken joq. Naqty soma 221 mlrd teńgeni qurady.
«Salyqtyq ákimshilendirýdiń álsiz bolýy, bıýdjetke Ulttyq qordan qosymsha karjy tartýyna alyp keldi. 2020 jyly respýblıkalyq bıýdjet kiristeriniń 45%-y Ulttyq qordan transfertter túsimderi. Somasy 4,8 trln teńgeni qurady. Bul – sońǵy jyldardaǵy eń joǵary kórsetkish. Úkimetke bolashaqta, ulttyq qorsyz tek boryshtary ǵana qalýy múmkin ekenin túsinetin ýaqyt keldi. Sondyqtan búgin Ulttyq qor týraly oılamaý, ol eldiń bolashaǵy týraly oılamaýmen birdeı», - dedi Amanjan Jamalov.
Budan buryn habarlanǵandaı, Parlament palatalarynyń birlesken otyrysynda Qarjy mınıstri Erulan Jamaýbaev orta merzimdi kezeńde transfert somasy birtindep qysqaratynyn aıtty.