Májilis depýtaty óńirlerde sapasyz salynǵan úılerdi tekserýdi surady
«Bizdiń depýtattyq saýalymyzǵa óńirlerdegi is-sapar barysynda turǵyndar memleket tarapynan halyqqa berilgen turǵyn úıler qurylysynyń sapasy nasharlyǵyn jetkizip, ásirese, memlekettik baǵdarlamalar boıynsha paıdalanýǵa tapsyrylǵan úılerdiń sapasy syn kótermeýine baılanysty halyq narazylyǵyn bildirýde. Barshamyzǵa belgili, jaqynda Úkimettiń keńeıtilgen otyrysynda elimizdiń Prezıdenti salynyp jatqan jańa úılerdiń sany men sapasyn tekserýdi tapsyrǵan bolatyn. Atap aıtsaq, ondaǵan jyldar boıy kezek kútip, baspanaǵa áreń qol jetkizgen turǵyndardyń ókpesi qara qazandaı. Óıtkeni úıleriniń shatyrynan sý sorǵalap, kirpishi qulaǵan, qabyrǵasy jarylyp, kóterilip, edeni opyrylǵan, syrty túse bastaǵan», - dedi F. Qarataev Úkimet basshysy Álıhan Smaıylovtyń atyna joldaǵan saýalynda.
Onyń aıtýynsha, sapasyz úılerdiń basym bóligi «Nurly jer» jáne basqa da memlekettik baǵdarlamalar aıasynda salynǵan jáne ıpoteka arqyly áleýmettik osal toptaǵy azamattarǵa berilgen.
«Ókinishke qaraı, atalǵan turǵyn úı keshenderinde qanshama halyq janyn shúberekke túıip amalsyz ómir súrýde. Erteń osy úıler qulasa buǵan kim jaýapty bolmaq? Bul degenińiz óte ózekti jáne kezek kúttirmes úlken másele. Joǵarydaǵy máseleniń ózektiligin eskerip, respýblıkalyq komıssııa qurýdy, onyń quramyna qoǵam belsendilerin jáne turǵyn úı alýshylardy engizýdi usynamyz. Sonymen qatar, barlyq oblystardaǵy, qaladaǵy problemalyq turǵyn úılerdi qaıta tekserýden ótkizip, úılerde turý qaýipsizdigin, avarııalyq deńgeıin anyqtaý kerek. Respýblıka boıynsha turǵyn úılerdi qabyldaıtyn tıisti jergilikti atqarýshy organdardy tekserip, kinálilerdi jaýapqa tartýdy, depýtattyq saýalǵa zańnamaǵa sáıkes jazbasha jaýap berýińizdi suraımyz», - dedi depýtat.