Májilis depýtaty óleń shyǵarǵan jaýyngerge rızashylyǵyn bildirdi
QR Ulttyq ulany «Batys» óńirlik qolbasshylyǵynyń baspasóz qyzmetinen túsken málimetke qaraǵanda, halyq qalaýlysy 5517-áskerı bólimniń tynys-tirshiligimen tanysty.
«Batys» óńirlik qolbasshylyǵynyń basqarmasy jáne áskerı bólimniń qyzmetkerlerimen júzdesýde Májilis depýtaty Elbasynyń bıylǵy Joldaýyna, «Bolashaqqa baǵdar: rýhanı jańǵyrý» baǵdarlamalyq maqalasyna jáne «Prezıdenttiń bes áleýmettik bastamasyna» baılanysty alda turǵan maqsat-mindetterdi áńgimelep berdi.
Máńgi murat - ata-babalarymyz qanyn da, janyn da aıamaǵan azattyǵymyzdy aıalap, uly mártebeli táýelsizdigimizdi baıandy etý. Eldiń birligi barda - damý da bar. Osy oraıda bes áleýmettik bastama barlyq saladaǵy qyzmetkerlerdiń, sonyń ishinde áskerı qyzmetshilerdiń maqsat-múddesine saı óristeı beretin bolady. Eń bastysy, ulttyq rýh myqty bolýy kerek. Depýtat sóziniń negizgi túıini osyǵan saıdy.
Baqytbek Smaǵul óz ómirindegi eleýli kezeń - Aýǵan soǵysyna erekshe toqtaldy. Talaı qandy joryqty bastan ótkizgen maıdanger qalamger, Qazaqstan Jazýshylar odaǵy múshesiniń «Aýǵannyń ot jalyny», «Men kórgen soǵys» syndy kitaptar jazǵany belgili. Jaýyngerler ardagerdiń sózin uıyp tyńdap, ón boıynan ótkizgendeı boldy.
Májilis depýtaty jýyrda premerasy bolǵan «Altynshy beket» kórkem fılmi týraly da aıtyp, Ulttyq ulan qatarynda óz Otanyn qorǵaıtyn jaýyngerlerdiń kóbeıe beretinine senim bildirdi. Sodan keıin osyǵan qatysty óz óleńin oqyp berdi.
Mýzeıge ekskýrsııa barysynda «Batys» óńirlik qolbasshysynyń tárbıe jáne áleýmettik-quqyqtyq jumystar jónindegi orynbasary, polkovnık Berik Omarov óńirlik qolbasshylyqtyń ónegeli tarıhy týraly áńgimelep berdi. 5517-áskerı bólimniń qatardaǵy jaýyngeri Maǵjan Ýsal Májilis depýtatynyń nazaryna óz jyryn usyndy. Buǵan áserlengen Baqytbek Smaǵul jaýyngerge rızashylyǵyn jetkizip, áskerı boryshyn abyroımen atqarýyna jáne týǵandaryna aman-esen oralýyna tilektestigin bildirdi.
Aıta keteıik, Májilis depýtattary Baqytbek Smaǵul, Amanjan Jamalov, Saparhan Omarov, sondaı-aq senatorlar Erbolat Muqaev, Narıman Tóreǵalıev BQO-ǵa jumys sapary barysynda kásiporyn-mekemelerde, oblys aýdandarynda bolyp, turǵyndarǵa Elbasy Joldaýy, bes áleýmettik bastama jáne memlekettik baǵdarlamalardyń júzege asyrylý barysyn aıtyp berdi.