Májilis depýtaty Maqanshy aýdanynyń qaıta qurylýyna qatysty ózekti máselelerdi kóterdi

ABAI OBLYSY. QazAqparat - «AMANAT» partııasy fraktsııasynyń múshesi Nurtaı Sabılıanov halyqpen kezdesýin Abaı oblysynyń Maqanshy aýylynan bastady, dep habarlaıdy QazAqparat QR Parlamenti Májilisiniń baspasóz qyzmetine silteme jasap.

Kezdesý barysynda depýtat Memleket basshysy Maqanshy aýdanyna nazar aýdaryp otyrǵanyn aıtty.

Prezıdentimiz Ulttyq Quryltaıda Maqanshy aýdanyn qalpyna keltirý týraly sheshim qabyldaǵany belgili. Maqanshynyń áleýeti myqty. Óńirde týrızm, ken óndirisi, Qytaımen shekaradaǵy keden beketi arqyly saýda-sattyq jaqsy damyǵan. Maqanshy aýdanyn jedeldetip qalpyna keltirý maqsatyndaǵy jumystarǵa biz de óz quziretimiz sheńberinde yqpal etetin bolamyz, – dedi Nurtaı Salıhuly.

Turǵyndar aýyl sharýashylyǵyna, sonyń ishinde mal ósirýge, egin egýge, ınfraqurylymdy damytý, kógildir otynmen qamtamasyz etý máselelerine qatysty ózekti máselelerdi kóterdi.

Odan ári Nurtaı Sabılıanov azamattardy jeke máseleleri boıynsha qabyldady.

Osy kúni depýtat Úrjar aýdanyna jumys sapary aıasynda Malaq aýylyndaǵy sýmen jabdyqtaý nysandarynyń qurylysymen tanysty.

Sý qubyry jelisi 8,933 shaqyrym, tereńdigi 55 metr. Merdiger mekeme ókilderiniń aıtýynsha, qurylys jumysyn qazan aıynyń sońyna deıin aıaqtaý josparlanǵan.

Depýtattyń kezdesýi odan ári Úrjar aýdanynyń Joǵarǵy Eginsý, Aıtbaı, Taskesken aýyldarynda, Aqsýat aýdanynyń Qyzyl-Kesek, Qumqól, Tanamyrza aýyldarynda, Kókpekti aýdanynyń Kókpekti, Sháriptoǵaı, Shuǵylbaı, Bıǵash aýyldarynda, Jarma aýdanynyń Shar qalasy, Qalbataý aýyldarynda, Aıagóz aýdanynyń Tarbaǵataı, Saryarqa, Qaraǵash, Malkeldi, Barshatas, Baıqoshqar aýyldarynda, Abaı aýdanynyń Qaraýyl, Arhat, Qasqabaq aýyldarynda, Semeı qalasynda jalǵasady.