Májilis depýtaty qandastarǵa UBT talaptaryn jeńildetýdi usyndy
«Búginde shekaranyń arǵy betindegi myńdaǵan balalarymyz joǵary bilim alýy úshin Atamekenge qol sozyp tur. Al qol ushyn berýi tıis bizdiń Bilim mınıstrligi ne isteýde? Pandemııada shekaralar shegendeýli kezde Qazaqstanǵa kelip Ulttyq Biryńǵaı Test tapsyrýlaryń kerek dep tur. Ulttyq testileý ortalyǵy qandastardy bıyl 15 sáýirden 30 maýsymǵa deıin qabyldaıdy. Álemniń kóp elderinde shekaranyń jabyq ekenin eskerip, pandemııanyń kelesi tolqyndarynyń kúshtiligin baıqasaq shekaranyń maýsym aıyna deıin ashylmaıtyny aıqyn. ıAǵnı, biz Atamekende bilim alam degen qandastarymyzdy oqýǵa qabyldaı almaı qalýymyz múmkin», - dedi depýtat Májilistiń jalpy otyrysynda.
Onyń aıtýynsha, Úkimettiń 2020-2030 jyldarǵa arnalǵan Syrtqy saıasat tujyrymdamasynda qandastarǵa barynsha jan-jaqty qoldaý kórsetilýi týraly aıtylǵan.
«Sheteldegi qandastardy Qazaqstanǵa shaqyrýdyń biregeı joly – atamekende tegin bilim alýǵa múmkindik jasaý. Sol sebepti, sońǵy ótken quryltaıda Elbasy sheteldegi qazaq balalarynyń Qazaqstanda bilim alýyna jaǵdaı jasap, kvotany 2 ese kóbeıtý týraly tapsyrma bergen bolatyn. Alaıda bul granttar eshqashan tolyq ıgerilgen emes. Mysaly 2020 jyly 2022 qandasymyz Qazaqstanda oqýǵa talaptanyp, 930-y ǵana oqýǵa qabyldanǵan. Endi olardyń da oqýyn jalǵastyrýy qıyn bolyp tur. Ne úshin Atamekende oqýǵa nıet bildirgen barlyq qandastardy qabyldap almasqa?!. Kórshiles Reseı barlyq TMD elderine bólinetin grantynyń sanyn 2024 jylǵa deıin 30 myńǵa kóterýdi josparlap otyr. Al biz oqýǵa kelemin dep otyrǵan óz baýyrlarymyzǵa qoldan jasalǵan kedergilermen keýdelerinen keri ıterýdemiz. Shekaranyń jabyq ekenin bile tura, olarǵa Qazaqstan aýmaǵyna kelip test tapsyrasyzdar dep talapty qalaı túsinemiz? Buny áıgili mysaldaǵy túlkiniń tyrnany qonaqqa shaqyryp, asty jaıpaq ydysqa quıyp berýinen de asqan mazaq deýge bolady», - deıdi Q. Isa.
Sonymen birge, 2020 jyly myńǵa jýyq qandas daıyndyq kýrstaryna túsip, onlaın túrde oqyǵan.
«Oqýǵa memlekettik qarjy bólindi. Al endi sol balalar UBT tapsyryp JOO túsý kerek. Olardyń 90% shet memleketterde, Mońǵolııa, Ózbekstan, Qytaı, Túrkmenstan t.b. turady. Endi olar pandemııa tosqaýylynda qalaı Qazaqstanǵa kelip UBT tapsyrady? Sonda memleket qarjy bólip, oqytyp jarty jolda tastap kete me? Kórshi el Qytaıdan 2019 jyly oqýǵa 50-ge jýyq bala kele aldy. Qazir 300-ge jýyq bala kelýi yqtımal. Al endi balalar shekara asyp jetkende, bizdiń Úkimet qushaq jaıyp qarsy ala qoıa ma? Osy máselelerdi eskere otyra, shekara ashylmaǵan jaǵdaıda, UBT tapsyrýdyń basqa da joldaryn qarastyrýdy suraımyz.
1.UBT talaptaryn qandastarǵa jeńildetý
2.Qandastar turyp jatqan memleketterge baryp qabyldaý;
3.Elshilikterdiń ǵımaratarynda uıymdastyrý;
4. Qandastarǵa UBT-ny 2020 jylǵy tájirıbeni Іske asyryp, onlaın qabyldaý», - dep usynys bildirdi Májilis depýtaty.