Májilis depýtaty gaz qubyrlaryna qatysty problemany aıtty

NUR-SULTAN. QazAqparat - Májilisiniń depýtaty, «NUR OTAN» partııasy fraktsııasynyń múshesi Qudaıbergen Erjan elimizdiń ınfraqurylym nysandarynyń qurylysyna jáne qaıta jandandyrý jumystaryna bıýdjetten bólingen memleket qarajattaryn atqarý organdarynyń mardymsyz paıdalanýy máselesin kóterip, Májilistiń jalpy otyrysynda depýtattyq saýal joldady, dep habarlaıdy QazAqparat tilshisi.

«Jyl saıyn bıýdjetten halyqtyń tynys-tirshiligin qamtamasyz etetin ınfraqurylymdy damytýǵa qyrýar qarajat bólinedi. Alaıda, jyl saıyn aıaqtalǵan, biraq jumys istemeıtin nemese jyldan jylǵa aıaqtalmaıtyn nysandarǵa, jobaly-smetalyq qujattamalardy túzetýlerge, sybaılas jemqorlyq quqyq buzýshylyqtaryna, sapasyz istelgen jumystarǵa kezigemiz. Osynyń bári atalǵan salalarda memlekettiń basty maqsattaryna jetýge keri áserin tıgizýde. Ózderińizge belgili, Elbasynyń qoldaýymen 2013 jyly «Beıneý-Bozoı-Aqbulaq» magıstraldy gaz qubyrynyń qurylysy aıaqtalyp, Túrkistan, Jambyl, Almaty oblystaryn tabıǵı gazǵa qosý múmkindigi paıda boldy. Degenmen, bitip turǵan gaz qubyrlaryn «QazTransGazAımaq» AQ eksplýatatsııaǵa almaı otyr. Oǵan sebe - tapsyrys berýshi retindegi ákimshilikterdiń jáne eksplýatatsııalaýshy mekeme bolyp sanalatyn «QazTransGazAımaq» AQ arasyndaǵy áreketterdiń kelisilmeýi jáne áreketterdegi tujyrymdamalyq sheshimderdiń bolmaýy. Nátıjesinde, tapsyrys berýshi qabyldaǵan nysandar paıdalanýǵa berilmeıdi, sol arqyly gaz qubyry túrindegi memleket qarajaty ondaǵan jylǵa aınalymsyz qalady», - dedi Q. Erjan Úkimet basshysynyń orynbasary Roman Sklıardyń atyna joldaǵan saýalynda.

Onyń aıtýynsha, aıqyn mysaldardyń biri ol - Túrkistan oblysynyń Saryǵash jáne Keles aýdandary. Saryaǵash aýdanynyń 13 eldi mekeni jáne Keles aýdanynyń 6 eldi mekeni, jalpy alǵanda 80000-ǵa jýyq halyq gazben qamtylmaǵan. Alaıda, atalǵan eldi mekenderde ishki gaz júıeleriniń qurylysy aıaqtalǵan. Sonymen qatar, Taskesken aýylyndaǵy AGTS-tyń qurylysy 2013 jyly aıaqtalyp, biraq paıdalanýǵa 8 jyl ótken soń 2021 jylǵy 5 tamyzda berildi.

«Óz kezeginde, Saryaǵash aýdanynyń ákimshiligi aǵymdaǵy jylǵy 11 tamyzda Facebook paraqshasyna sımvoldy túrde gaz alaýy jaǵylyp, Baǵys jáne Tegisshil aýyldarynyń turǵyn úıleri, sonymen birge, Saryaǵash aýdanynyń 38 eldi mekeni, Keles aýdanynyń 39 eldi mekeni gazdandyryldy dep jarııalady. Alaıda, joǵaryda jazylǵandaı «sımvoldy túrde gaz alaýy jaǵyldy», ıá, bári rasynda da sımvoldy túrde ótti, sebebi atalǵan eldi mekender gazǵa qosylmaǵan. Aǵymdaǵy jyldyń 19-27 tamyz aralyǵynda óńirlerge saparymyz aıasynda atalǵan eldi mekenderdiń turǵyndarymen kezdesip, osy jaǵdaılarǵa kóz jetkizildi. Mundaı jaǵdaı elimizdiń basqa óńirlerinde de bar ekenin atap ótý qajet», - dedi depýtat.

Onyń sózine qaraǵanda, búgingi kúni eksplýatatsııalaýshy mekemelerdiń teńgerimine berilmegen nysandardyń jalpy sany 1227 quraıdy, onyń ishinde 143 nysan qujattama tolyq jınaqtalmaýy sebebinen, sondaı-aq qurylys barysynda jiberilgen tehnıkalyq buzýshylyqtardyń saldarynan problemaly bolyp otyr.

Osy oraıda joǵaryda atalǵannyń negizinde kelesi máselelerdi qarastyrý usynyldy:

1. Qurylysy aıaqtalyp paıdalanýǵa tapsyrylǵan nysandardy eksplýatatsııa jasaýshy mekemeniń teńgerimine ótkizý sharalaryn merzimin qysqartyp ońtaılandyrý.

2. Infraqurylymdyq nysandar qurylysynyń joba-smetalyq qujattamasyn daıyndaý jáne tehnıkalyq qadaǵalaý jumysyn júrgizý kezinde «QazTransGaz» AQ sııaqty salalyq mekemelerdiń qatysýy.