Májilis depýtaty fosfogıps qaldyǵyn tıimdi paıdalanýdy usyndy
«Jambyl oblysy aýmaǵyndaǵy «Qazfosfat» JShS – Qazaqstandaǵy hımııa ónerkásibiniń alyby. Kompanııa ónimderi búkil álemdik suranysqa ıe. Bul rette kásiporynnyń tıimdiligimen birge fosfogıps qaldyqtary da ósýde. Aıta ketý kerek, fosfogıps qaldyq ónim bolǵanymen, ol – ekonomıkalyq turǵydan alǵanda óte qundy zat. Aýyl sharýashylyq topyraqtaryndaǵy sortań, tuzdalǵan jerdiń balansyn qalpyna keltiretin melıorant retinde belgili. Aýyl sharýashylyǵy óniminiń túsimin 2-3 esege ulǵaıtýǵa múmkindik beredi. Alaıda bul kúnderi Taraz qalasynyń tap qasynda, Taraz-Asa baǵytyndaǵy jol shetinde taý-taý bolyp úıilip jatqan, ıaǵnı 14 mıllıon tonna fosfogıps qaldyǵy aımaqtyń ekologııalyq jaı-kúıine eleýli túrde áser etip otyr. Jyl saıyn oǵan 2 mln tonna fosfogıps qaldyǵy qosylady», - dedi M.Tólepbergen Premer-Mınıstrdiń birinshi orynbasary Roman Sklıardyń atyna joldaǵan saýalynda.
Onyń aıtýynsha, 2020 jyly Ekologııa, geologııa jáne tabıǵı resýrstar mınıstrligimen birlesip, Jambyl oblysyndaǵy ekologııalyq máselelerdi keshendi sheshýdiń Jol kartasy ázirlengen. Onda atalǵan qaldyqty melıorant retinde aýyl sharýashylyǵy salasynda qoldanýǵa bolatyny aıqyndalǵan. Alaıda, Jol kartasy búginderi júzege aspaı otyr. Kompanııanyń mıneraldy tyńaıtqyshtar óndirisiniń josparly ulǵaıýyna baılanysty 135 gektar jerge endi úshinshi úıindi salý jóninde jobaǵa kelisilgen. Jobalyq kólemi 19 mln tonnadan asady. Fosfogıpstiń úıindilerde taý-taý bolyp jınalýy 400 myńǵa jýyq halqy bar Taraz qalasy úshin erekshe ekologııalyq másele bolyp otyr jáne qalyptasqan jaǵdaı tabıǵatty qorǵaýdyń shuǵyl qadamdaryn qarastyrý talabyn kúsheıtedi.
«Qoǵamdyq máni zor osy máselelerdi tıisti mınıstrlikterdiń qatysýymen jan-jaqty sheshý kerek. Birinshiden, óndiristik ónimdi tıimdi paıdalanýdyń múmkindikterin keńeıtip, óńirlerge jáne fermerlerge tasymaldap jetkizý úshin sýbsıdııa esebinen qarjy bólýdi uıymdastyrýdy suraımyz. Ekinshiden, óńirde osy ózgeshe ekologııalyq ahýaldy jaqsartýdyń barlyq amaldaryn shuǵyl qarastyrý kerek», - dedi depýtat.
Budan buryn habarlanǵandaı, bıyl sáýir aıynda Senatta Jambyl oblysyndaǵy fosfogıpstiń máselesi kóterilgen bolatyn.