Májilis depýtaty elimizdegi jylý elektr ortalyqtaryn tekserýdi usyndy

ASTANA. QazAqparat – Májilis depýtaty Erlan Saırov elimizdegi jylý elektr ortalyqtaryna qatysty jaǵdaıdy tekserý boıynsha Úkimet basshysy Álıhan Smaıylov pen Bas prokýror Berik Asylovtyń atyna saýal joldady, dep habarlaıdy QazAqparat tilshisi.

«Elimizde jylytý maýsymy bastalmaı jatyp, Qazaqstan qalalarynda jylý elektr ortalyqtary isten shyǵyp, Rıdder, Ekibastuz qalalarynda tehnogendi apat jaǵdaıy qalyptasty. Prezıdent Qasym-Jomart Toqaev jaǵdaıǵa shuǵyl baǵa berip Úkimetke elimizdiń barlyq jylý obektilerin tekserip, apatty jaǵdaı bolmaýy úshin tıisti is-sharalar jóninde tapsyrma berdi. Osyǵan oraı, «AMANAT» partııasy fraktsııasynyń músheleri Ekibastuz qalasyna baryp, qıyn-qystaý kezeńde halyqpen birge bolyp, jurtshylyqtyń pikirin tyńdady. Máseleni jurtshylyqpen jan-jaqty qarastyrdyq», - dedi E. Saırov.

Onyń aıtýynsha, energetıka salasyndaǵy negizgi problemalar magıstral jelileriniń tozýyna qatysty bolyp tur. Ekibastuzda jelilerdiń tozý dárejesi 91 paıyzǵa jetken. Bul turǵyda jylý elektr ortalyqtaryn jańartýǵa nazar aýdarylmaǵan, sondaı-aq osy ınfraqurylymǵa ınvestıtsııa jetkiliksiz bolyp tur.

Depýtattyń paıymynsha, strategııalyq nysandardy túrli jolmen ádiletsiz ıemdenip, osy halyqtyń múlkin ondaǵan jyldar boıy ıgerip, paıda taýyp otyrǵan olıgarhııalyq toptar elimizdiń aýmaǵyndaǵy magıstral jelileri men jylý elektr stantsııalaryn jańǵyrtýǵa qarjy salǵysy kelmeıdi.

«Olıgarhııalyq toptar bul nysandardyń paıdasyn súlikteı soryp, endi problemany memleketke, halyqqa ilmekshi. «AMANAT» partııasy halyqtyń muń-múddesi, ár-bir azamattyń jan tynyshtyǵy basty maqsat dep esepteıdi. Úkimet Memleket basshysynyń tapsyrmasy aıasynda myna máselelerge basa nazar aýdarýy qajet. Birinshiden, energetıka kásiporyndaryn tolyq tehnıkalyq aýdıtten ótkizý kerek. Ekinshiden, jylý elektr ortalyqtarynyń, magıstarl jelileriniń tozý dárejesin anyqtaı otyryp, halyqtan alynatyn tarıf aıasynda ınvestıtsııalyq qarajattyń qaıda ketkenin anyqtaý kerek», - dedi Erlan Saırov.

Sonymen qatar ol jylý elektr ortalyqtary men tıisti jelilerdiń tehnıkalyq jaǵdaıy úshin kásiporyn aktsıonerleriniń quqyqtyq jaýapkershiligin qarastyrý kerek ekenin atap ótti.

«2015-2022 jyldary jylý júıelerine túrli memlekettik baǵdarlamalar arqyly 183 mlrd teńge bólingen. Osy somanyń qaıda, qalaı jumsalǵanyna tekserý júrgizý mańyzdy. Jalpy energetıka salasyna , qoǵamdyq baqylaý ornatýǵa jan-jaqty mán berý kerek», - dedi E. Saırov.

27 qarashada Ekibastuz jylý elektr ortalyǵynda apat bolyp, qala turǵyndary jylýsyz qalǵan edi.

Osydan keıin qaladaǵy balalardy qoldaý ortalyǵynyń tárbıelenýshileri Pavlodarǵa aýystyrylyp, mektep oqýshylary onlaın bilim alýǵa kóshirildi.

Premer-Mınıstr Álıhan Smaıylov Ekibastuz qalasyndaǵy jaǵdaıdy qalpyna keltirý boıynsha birqatar tapsyrma berdi.