Májilis depýtaty bıýdjettegi túzetýlerdi synǵa aldy
«Meniń bir ǵana saýalym bar. Aýyl sharýashylyǵyn nege sonshalyqty jaqsy kórmeısizder? Suraqty nelikten bulaı qoıyp otyrmyn. Siz ózińizdiń sóz sóıleýińiz barysynda syıaqy kýpony týraly aıttyńyz. Men úshin, nelikten 17 mlrd teńgeni alyp qoımaq bolyp otyrǵandaryńyz múldem túsiniksiz. Zań jobasynyń qazirgi ýaqytta Senat qaraýyna jatqanyna jáne onyń taıaý aralyqta qabyldanatyndyǵyna qandaı kepil bar? Aýyl sharýashylyǵy mınıstrligi, baǵdarlama ákimshisi odan keıin bul aqshany qalaı alady. Bul qarajattyń bıýdjetke qaıtarylýyna kim bastamashy boldy?», - dedi Májilis depýtaty talqylaý barysynda QR Qarjy vıtse-mınıstri Berik Sholpanqulovqa qarata.
Sonymen qatar ol «Nur Otan» partııasynyń «Qazaqstan 2021: birlik, turaqtylyq, jasampazdyq» atty saılaýaldy baǵdarlamasynda sýbsıdııalaý júıesin jetildirýge baǵyttalǵan birneshe pozıtsııanyń bolǵanyn eske saldy. Al qazirgi respýblıkalyq bıýdjet túzetýinde asyl tuqymdy mal sharýashylyǵyn sýbsıdııalaý jáne damytýǵa, mal sharýashylyǵynyń ónimdiligin ári ónim sapasyn arttyrýǵa kózdelgen 36,5 mlrd teńge qoldaý tappaǵandyǵyna nazar aýdartty.
«Sizder, qarjygerler jem-shóp bazasy bolmasa mal sharýashylyǵy da bolmaıtyndyǵyn qalaı túsinbeısizder. Al mal sharýashylyǵymyz bolmasa onda dúken sórelerinde ettiń ózi de bolmaıdy. Bul tizbekter bir-birimen baılanysty. Tıimsiz sýbsıdııalardan bas tartý mindeti qoıylǵandyǵy túsinikti. Biraq, bul saladaǵy barlyq sýbsıdııany alyp tastaý kerek degendi bildirmeıdi. Búginde aýyl sharýashylyǵy taýaryn óndirýshilerimiz onsyz da qıyn jaǵdaıǵa tap bolyp otyr. Aýa raıy nashar bolyp tur. Qajetti astyqty bastyryp úlgermeımiz, eki ret qurǵaqshylyq oryn aldy. Al sizder ekonomıkanyń shynaıy sektoryn qoldaýdy qysqartyp jatyrsyzdar. Bul men úshin túbegeıli túsiniksiz jaıt. Mundaı túrde bul bıýdjet qabyldanbaýy tıis», - dedi depýtat.
Joǵarydaǵy saýaldarǵa jaýap bergen qarjy vıtse-mınıstriniń aıtýynsha, syıaqyǵa kýpon boıynsha sýbsıdııa tóleýge kózdelgen 16,7 mlrd teńge qysqartylǵan. Degenmen bul soma rezervte tur. Al aýyl sharýashylyǵyn sýbsıdııalaýǵa kózdelgen 36 mlrd teńgege qatysty ótinim Aýyl sharýashylyǵy tarapynan túskenin aıtty.