Májilis depýtaty: Bizge áleýmettik turǵyn úıdi kóbirek salý kerek

ASTANA. QazAqparat – Májilis depýtaty Gaýhar Tanasheva Jibek Joly arnasynyń Májilis ǵımaratynan júrgizgen tikeleı efıri kezinde áleýmettik turǵyn úılerdi kóptep salý kerek degen paıym aıtty, dep habarlaıdy QazAqparat tilshisi.

«Bizge kóbinese áleýmettik turǵyn úı salý kerek. Qazir ol az. Bul máseleni bólek qarastyrý qajet. Sebebi berilip jatqan sharshy metrler (baspana – red.) az. Mysaly, 9 adam turatyn otbasylar bar. Ipoteka aldyq dep qýanady. Al olarǵa tıetini 30-40 sharshy metr úı. Bul mundaı úlken otbasyna óte az dep esepteımin. Bul jaǵyn da qarastyrý kerek», - dedi ol.

Depýtat memleket tarapynan kópbalaly analarǵa berilip jatqan áleýmettik kómektiń mólsheri de jetkiliksiz dep esepteıdi.

«Mysaly men de kópbalaly anamyn. 2021 jyly joldasym qaıtys bolǵan. Múgedektigi bar balamdy qazir jalǵyz ózim tárbıelep otyrmyn. Sondyqtan baspana máselesi bar otbasylardyń problemasyn túgel óz basymnan ótkizdim. Máselelerdiń bárin bilemin.

Biz alǵash úı alǵanda qazirgideı kópbalaly analarǵa jeńildik bolǵan joq. Sondyqtan shaǵyn baspanamen shektelýge májbúr bolǵan edik. 2019 jylǵa deıin búkil balaǵa alatyn áleýmettik kómek 10 myń teńgedeı bolatyn. Qazir biraz jaqsardy, biraq ol da jetkilikti emes», - dedi Gaýhar Tanasheva.