Májilis depýtaty Berik Ábdiǵalıulynyń ókilettigi toqtady

NUR-SULTAN. QazAqparat – Búgin Parlament Májilisiniń jalpy otyrysynda depýtat Berik Ábdiǵalıulynyń ókilettigin merziminen buryn toqtatý týraly sheshim qabyldandy, dep habarlaıdy QazAqparat tilshisi.

«QR Prezıdentiniń 2022 jylǵy 11 maýsymdaǵy Jarlyǵymen Parlament Májilisiniń depýtaty Berik Ábdiǵalıuly Ulytaý oblysynyń ákimi laýazymyna taǵaıyndaldy. Osyǵan oraı Ortalyq saılaý komıssııasy sizderdiń nazarlaryńyzǵa Konstıtýtsııanyń 52-babyna, «Parlament jáne onyń depýtattarynyń mártebesi týraly» Zańnyń 24-baby 3 jáne 8-tarmaqtaryna sáıkes, Májilis depýtaty Berik Ábdiǵalıulynyń ókilettiligin merziminen buryn toqtatý týraly máseleni sheshý úshin usynym engizip otyr», - dedi Ortalyq saılaý komıssııasynyń múshesi Shavhat Ótemisov.

Palata depýtattary bul usynymǵa qoldaý bildirdi.

Budan buryn habarlanǵandaı, Berik Ábdiǵalıuly Ulytaý oblysynyń ákimi laýazymyna taǵaıyndaldy. Tıisti Jarlyqqa Memleket basshysy qol qoıdy.

Ol 2019 jylǵy qazan men 2021 jylǵy qańtar – Qaraǵandy oblysy Ulytaý aýdanynyń ákimi boldy. 2021 jyldan Parlament Májilisiniń depýtaty.