Májilis depýtaty balalar quqyǵyn qorǵaýǵa baǵyttalǵan zańnamalyq ózgertýlerdi túsindirdi
«Balalar quqyǵyn qorǵaý boıynsha keıbir zańnamalyq aktilerge ózgertýler men tolyqtyrýlar engizý týraly» zań jobasy aıasyndaǵy jumys toby osydan 10 aı buryn 2020 jyldyń mamyr aıynda qurylǵan edi. Sonymen qatar qazirgi ýaqytta Májilistiń 7-shyqyrylymy depýtattarynyń quramy jáne qoǵam belsendileri qatarynan osy ózgertýler men tolyqtyrýlardy engizý jónindegi jańa jumys toby quryldy. Jumys tobynyń quramy 65 adamnan turady. Onyń ishinde Májilis depýtattary, ÚEU ókilderi, psıhologtar men pedagogtar, memlekettik organdardyń ókilderi, balalar men otbasylarǵa kómek kórsetý salasyndaǵy sarapshylar, ǵylym doktorlary, quqyqtanýshylar bar. Qańtar aıynan bastap jańa jumys tobymen 3 otyrys, al 2020 jyldan beri 14 otyrys ótti», - dedi Májilis depýtaty Ortalyq kommýnıkatsııalar qyzmetindegi baspasóz máslıhaty barysynda.
Onyń aıtýynsha, qazirgi ýaqytta elimizdiń 3 kodeksine, 6 zańyna 35-ten astam ózgertý men tolyqtyrý usynylyp otyr. Onyń ishinde jetim balalar men erekshe balalardy tárbıelep otyrǵan otbasylardyń turǵyn úı máseleleri boıynsha, erekshe qajettiligi bar balalarǵa arnalǵan ońaltý ortalyqtaryn ashý, jábirleý túsinigin engizý, sonymen qatar áleýmettik kómek kórsetýge baılanysty jáne ózge de normalar bar.
«Qoǵamda biraz suraq legin týǵyzyp otyrǵan «jábirleý» uǵymynyń redaktsııasyn talqylaý úshin arnaýly saraptama alańy jumys isteıdi. Búginde qoǵamda másele týdyryp otyrǵan osy bir túsinik bar. Sol sebepti osy jaıynda toqtalýdy jón kórip otyrmyn. Onyń basty sebebi - áleýmettik jeli, WhatsApp messendjerinde zerdelenbegen, shynaıy emes aqparattardyń taratylýy, olardyń kóbiniń dáıeksiz halyq arasynda talqylanýy. Kóptegen qoǵam belsendileri bul túsiniktiń «qazaq dástúrine qarsy, qazaqılyqty joıýǵa jumys jasaý úshin engizip otyr» dep túsinedi. Bul olaı emes. Kerisinshe, ózge balanyń qadirin qurmetteý men ony syılaýǵa baǵyttalady. Bilim berý mekemelerindegi jábirleýdi boldyrmaý jáne oǵan jaýap berý úshin júıeli sharalar qabyldaýdyń mańyzdylyǵyn kórsetip otyr», - dedi Elnur Beısenbaev.