Májilis depýtaty Azat Perýashev Oraldaǵy «Zenıt» zaýytynyń ujymymen kezdesti

ASTANA. QazAqparat - Parlament Májilisiniń depýtaty, «Aqjol» fraktsııasynyń jetekshisi Azat Perýashev qorǵanys jáne sharýashylyq maqsatyndaǵy ónimder shyǵaratyn «Zenıt» kásiporynynda boldy, dep habarlaıdy Májilistiń baspasóz qyzmeti.

Bes júzge jýyq adam jumys isteıtin zaýyt búginde Kaspıı teńizindegi shekara qyzmetinde júrgen kemelerdi qurastyrady.

Depýtat kásiporyn tsehtaryndaǵy jumystarmen tanysyp, ujym qyzmetkerleriniń suraqtaryna jaýap berdi.

Zaýyt qyzmetkerleri kásipodaqqa múshelikke ótý problemasyn qozǵady. Eńbek qaýipsizdigin qamtamasyz etý, qyzmetkerlerdiń áleýmettik-eńbek quqyqtaryn qorǵaý, jalaqysyn kóterý boıynsha biraz másele kóterildi. Azat Perýashev bul jaıttardy muqııat zerttep, zańnamalyq turǵyda qoldaý kórsetýge daıyn ekenin jetkizdi.

Sonymen qatar Májilis depýtaty Parlamentte qabyldanyp jáne qaralyp jatqan zańdarǵa, eńbek qaýipsizdigin qamtamasyz etý baǵytyndaǵy depýttardyń usynystaryn aıtyp, jan-jaqty túsindirip berdi.