Májilis depýtaty áskerı zeınetkerler tap bolǵan problemany aıtty
«Biz áskerı zeınetkerlerdiń baspanamen qamtamasyz etý problemasyna qatysty depýtattyq saýalymyzdy óz atyńyzǵa qaıta joldaýǵa májbúrmiz. Sebebi, quzyrly organdardyń jaýabyna qanaǵattanbadyq. Berilgen jaýapta, zapasqa 2013-2018 jyldar aralyǵynda ketken áskerı qyzmetkerlerdiń quqyǵy shektelgen joq, ol azamattarǵa kommýnaldyq baspana qorynan, memlekettik mekeme esebinen turǵyn úı berildi degen ýáj ras bolsa, azamattar óz problemalaryn osy kúnge deıin nege kóteredi? Resmı jaýapta problemasy bar azamattar sany nebári 20 adam degen aqparattyń da adaldyǵy kúmándi. Sebebi, muń-muqtaj, aryz-shaǵymyn aımaqty aralaý kezinde júzbe-júz, jumys adresine, odan qaldy jeke poshtaǵa joldaǵandar sany áldeqaıda kóp. Sondyqtan, Tótenshe jaǵdaılar mınıstrligine qarasty zeınetkerlerdiń (qutqarýshy bop qyzmet etken azamattar), keıbir quqyq qorǵaý organdary men Aıakóz, Taldyqorǵan, Qapshaǵaı, Jarkent, Saryózek, Jetigen, Arys, Shymkent, Gvardeısk, Lýgovskoı áskerı garnızondarynda qyzmet etken áskerı zeınetkerlerdiń amanatyna sońyna deıin adal bolýdy qosh kórip otyrmyz», - dedi Ǵazız Qulahmetov.
Onyń aıtýynsha, áskerıler jumystan ketý merzimine qaraı úsh kategorııaǵa jiktelgen. 2013 jylǵa deıin, 2013-2018 jyl aralyǵy jáne 2018 jyldan bastap ketkenderge ártúrli normalar qoldanylady.
«Bizdiń oıymyzsha, dıskrımınatsııalyq gradatsııany, alyp tastap, bárine ortaq norma qoldaný kerek. Osy rette, «Áskerı qyzmet jáne áskerı qyzmetkerlerdiń mártebesi» týraly zańynyń 55 babyndaǵy 6; 6-1; 7 tarmaqtardy alyp tastaǵan jón. Kelesi daýly másele, úı aıyrbastaý normasy. Zańnyń 98 babynda 2013-2018 jyldar aralyǵynda áskerı qyzmetten ketken azamattar sotqa barǵanda 101 baptyń 5 tarmaqshasyna sáıkes, menshik ıesiniń ruqsatyn alýǵa mindetti bop shyǵady. Menshik ıesi bul jaǵdaıda - áskerı bólimniń komandıri. Ol da baspana qory joq dep, ruqsatty bermeıdi. Sondyqtan, 101-2 babynyń 4 tarmaǵyn, 98 bapty alyp tastap, áskerı qyzmetten ketken, áli de ketetin qyzmetkerlerge 101-2 babynyń 5, 6 tarmaqtaryn qoldanǵan ádil», - dedi depýtat.
Onyń sózine qaraǵanda, kelesi másele, 2018 jyldyń 1 qańtaryna deıin qaza tapqan áskerı qyzmetkerlerdiń bala-shaǵasyna qaraılasý máselesine qatysty. Qarjylaı kompensatsııa men qyzmettik baspananyń muragerlik jolmen ıelený múmkindiginen aırylyp otyrǵan jesirler bar. Ol normany iske asyrý úshin Zańnyń 101-9 babynyń 2 tarmaǵyn alyp tastaý usynylady.
«Múgedek áskerı zeınetkerler men densaýlyǵyna baılanysty áskerı qyzmetten ketýge májbúr bolǵan azamattardyń jáı-kúıi de máz emes. Baspana tólemin sottyń birinshi ınstantsııa sheshimimen alyp, keıin sottyń joǵarǵy ınstantsııa sheshimimen qaıtadan ol aqshalaryn qaıtarýǵa májbúr bop jatqan azamattar da barshylyq. Elimiz áleýmettik memleket dep aıtar bolsaq, joǵary da aıtylǵan azamattardyń baspana alý múmkindigin shekteý áleýmettik prıntsıpterge qaıshy keler Konstıtýtsııalyq quqyqtaryn shekteý emes pe?! Salalyq mınıstrlikter - Qorǵanys mınıstrligi, Tótenshe jaǵdaılar mınıstrligi qordalanǵan problemalardy sheshý joldaryn izdep, óz zeınetkerleriniń ýájdaryn qanaǵattandyrýǵa nege tyryspaıdy? Sonymen qatar, depýtattarǵa ótinish joldaǵan azamattardyń aryzdaryn da qarap, zańda belgilengen tártippen jazbasha jaýap berýlerińizdi suraımyz», - dedi Ǵazız Qulahmetov.