Májilis depýtaty ár otbasyǵa 20 sotyq jer berýdi usyndy

NUR-SULTAN. QazAqparat – Májilis depýtaty Aıqyn Qońyrov jeke turǵyn úı qurylysyna jer telimin bólý boıynsha Úkimet basshysy Asqar Mamınniń atyna saýal joldady, dep habarlaıdy QazAqparat tilshisi.

«Qazaqstan Halyq partııasynyń baǵdarlamasyna árbir qazaqstandyq otbasyǵa úı salý jáne sharýashylyq júrgizý úshin 20 sotyq jer berý týraly tarmaq engizildi. Bastama qazaqstandyqtar arasynda qyzyǵýshylyq pen qoldaý týdyrdy. Usynys Halyq partııasynyń baǵdarlamasyna kezdeısoq engizilgen joq jáne bul ádemi ýádelerdi jınaýdyń tehnıkalyq qadamy da emes. Bul QHP-nyń jyldar boıy qalyptasqan áleýmettik-ekonomıkalyq jáne tipti ıdeologııalyq kún tártibiniń júıe quraýshy pýnkti. Ol biz basymdyq berip otyrǵan qoǵamnyń kózqarasynan týyndap otyr», - dedi depýtat Májilistiń jalpy otyrysynda.

Onyń aıtýynsha, molshylyqtyń taǵy bir mańyzdy krıterııi – laıyqty baspana, óz jerinde úı salý múmkindiginiń bolýy. Bul otbasylyq jáne áleýmettik materıaldyq ál-aýqattyń negizi. Elimizde turǵyn úı baǵdarlamalary kóp qabyldandy, qomaqty qarajat bólinýde. Biraq másele mynada – orta otbasyn turǵyn úımen qamtamasyz etý boıynsha maqsattar qoıylmaıdy. Úıler salynyp jatyr, degenmen halyqtyń kóp bóliginiń turǵyn úı jaǵdaıy jaqsaryp jatqan joq.

«Qazaqstan Halyq partııasy Úkimetti árkimniń óz úıin salýyna jaǵdaı jasaýǵa shaqyrady. Jer ýchaskelerin berý mańyzdy, ómirlik mindet, ol jeke baǵdarlamaǵa nemese ulttyq jobaǵa laıyq. (…)

20 sotyq jer bólýdi kedeıshilikpen kúres jáne Qazaqstanda aýqatty qoǵam qurý mindetterin sheshýdiń joly retinde qaraý kerek», - dedi A. Qońyrov.

Depýtattyq saýalda 20 sotyq jer berý asa bir shyǵyndy emes ekendigi atap ótilgen. Durys kózqaraspen qaraǵanda, onyń pragmatıkalyq ekonomıkalyq mańyzy zor.