Májilis depýtaty Alash áskeri bozdaqtarynyń resmı tizimin jasaýdy usyndy

NUR-SULTAN. QazAqparat – Depýtat Berik Dúısenbınov Saıası qýǵyn-súrgin qurbandaryn aqtaý jónindegi memlekettik komıssııaǵa birneshe usynys tastady, dep habarlaıdy QazAqparat.

Premer-Mınıstr orynbasary Eraly Toǵjanovqa baǵyttaǵan depýtattyq saýalynda májilismen Hangeldi Ábjanov tóraǵalyq etetin «Ádilet» qoǵamy men professor Ǵarıfolla Ánes basqaratyn «Arys» qoryna ashtyq qurbandaryn anyqtap, tizimdeý jumystaryn qolǵa alýda memlekettik deńgeıde qoldaý kórsetý kerek degen oı aıtady.

«Búginde Alash áskeriniń quramynda júrip janyn pıda etkenderdiń suraý salatyn izdeýshileri de joq. Árıne, olar áli kúnge deıin aqtalǵan joq. Nur Otan fraktsııasyndaǵy áriptesimiz Berik Ábdiǵalıuly bul taqyrypty zertteýdi bastap ketken de bolatyn. Bul kóterilisterde qurban bolǵan batyr babalarymyz ben Alash áskeriniń quramynda júrip, janyn pıda etkenderdiń tizimin anyqtaýdy resmı qolǵa alý qajet», - dedi depýtat.

Ol, sonymen birge, repressııa men ashtyqtan qashyp, shekarada qyzyldardyń qyrǵynyna ushyraǵan bosqyndardyń tizimin ártúrli derekkózderdi paıdalana otyryp anyqtaýdy usyndy.

«1920-1930 jyldary bolǵan 360-tan astam qarýly kóterilis pen ashtyq qurbandaryn tizimdeý barysynda olardyń týystary men búgingi urpaqtaryn izdestirip, ony jarııalap jáne jańalap otyrý úshin arnaıy resmı saıt ashyp, onyń turaqty jumys isteýin qamtamasyz etý jáne bul sharalardy «Rýhanı jańǵyrý» baǵdarlamasy aıasynda júzege asyrý kerek» delingen depýtattyq saýalda.