Májilis depýtaty 12 jeltoqsandy Alash kúni dep jarııalaýdy usyndy

ASTANA. QazAqparat – Májilis depýtaty Berik Dúısenbınov 12 jeltoqsandy Alash kúni dep resmı belgilep, jyl saıyn memlekettik deńgeıde atap ótýdi usyndy. Osy oraıda depýtat Premer-Mınıstr Álıhan Smaıylovtyń atyna saýal joldady, dep habarlaıdy QazAqparat tilshisi.

«Qazaq memlekettiligin qaıta jańǵyrtýda, ıaǵnı, táýelsizdiktiń negizin qalaýda HH ǵasyrdyń basynda zamanaýı qazaq memleketin qurýǵa umtylys jasap, bilimi men qajyr-qaıratyn salyp, osy jolda shahıd bolǵan ult kósemderiniń, Alash Respýblıkasy arystarynyń rólin erekshe atap ótýimiz kerek», - dedi B. Dúısenbınov.

Ol bul máselege qatysty buǵan deıin de saýal joldanǵanyn eske saldy.

«Bıyl Alash Respýblıkasynyń qurylǵanyna 105 jyl toldy. Esterińizge sala keteıin, 29 maýsymda «Aq jol» fraktsııasy bul datany memlekettik deńgeıde atap ótýdi talap etken depýtattyq saýal joldaǵan. Alaıda, Úkimet bul máseleni ókiletti mınıstrlikterge tapsyrǵany týraly jaýap berdi», - dedi depýtat.

«Búginde tarıhı ádildikti ornatatyn kún jetti dep sanaımyz. Tarıh taǵylymyn urpaqqa nasıhattaý maqsatynda «Aq jol» fraktsııasy alashtanýshy ǵalymdardyń bastamasyn qoldaı otyryp, 12 jeltoqsandy tarıhı qujattarmen dáleldengen Alash Respýblıkasynyń qurylǵan kúni retinde, ıaǵnı «Alash kúni» dep resmı belgileýdi jáne jyl saıyn memlekettik deńgeıde atap ótýdi suraıdy», - dedi Berik Dúısenbınov.

Foto: parlam.kz