Májilis depýtattyǵyna 7 partııadan 283 kandıdat básekeles bolady

ASTANA. QazAqparat – 19 naýryzda ótetin kezekten tys Májilis saılaýynda 7 partııadan 283 adam partııalyq tizim arqyly 69 mandat úshin básekege túsedi. Bul týraly Ortalyq saılaý komıssııasy tóraǵasynyń orynbasary Konstantın Petrov aıtty, dep habarlaıdy QazAqparat tilshisi.

«Keshe, 8 aqpan kúni saǵat 18-00-de barlyq óńirde Parlament Májilisi men máslıhattar depýtattyǵyna kandıdattardy usyný aıaqtaldy. Ortalyq saılaý komıssııasy saılaýǵa barlyq 7 saıası partııany jiberdi», - dedi ol komıssııa otyrysynda.

Onyń dereginshe, barlyq 7 saıası partııa Májilis saılaýyna qatysý úshin 283 kandıdattan turatyn partııalyq tizimin Ortalyq saılaý komıssııasyna usynǵan.

«Saıası partııa partııaǵa múshe bolmaǵan tulǵany tizimge qosýǵa quqyǵy joq ekendigin eske salǵym keledi. Partııalyq tizimge qosylǵan tulǵalar sany saıası partııalar araksynda bólinetin depýtattyq mandattyń belgilengen sanynan 30 paıyzǵa asyp ketpeýi tıis. Bul ary ketkende 90 adam, odan tómen de bolady. Partııalar partııalyq tizim sany qansha bolatyndyǵyn derbes anyqtady», - dedi Konstantın Petrov.

Sonymen Májilis saılaýyna 7 saıası partııa qatysady. Onyń ishinde partııalyq tizim arqyly Qazaqstan halyq partııasynan - 52, Aq jol partııasynan - 54, Jalpyulttyq sotsıal-demokratııalyq partııasynan – 19, «Baıtaq» jasyldar partııasynan» - 18, «Aýyl» partııasynan – 25, Respublica partııasynan – 25, AMANAT partııasynan – 90 kandıdat. Kandıdattardyń jalpy sany – 283. Ortalyq saılaý komıssııasyna kandıdattardyń atynan tapsyrylǵan qujattar «Saılaý týraly» Konstıtýtsııalyq zańǵa saı keledi.