Májilis depýtattary Jetisýda kásipkerliktiń, Aqtóbede qurylys jumystarynyń barysymen tanysty

NUR-SULTAN. QazAqparat – «AMANAT» partııasynyń QR Parlamenti Májilisindegi fraktsııasynyń ókilderi Jetisý men Aqtóbe oblysynda bolyp qaıtty, dep habarlaıdy QazAqparat Májilistiń baspasóz qyzmetine silteme jasap.

Baspasóz qyzmetiniń málimetterine qaraǵanda, Jetisý oblysyna jumys saparynda «AMANAT» partııasy fraktsııasynyń músheleri Danııar Álimbaev pen Álııa Ábsemetova Alakól aýdanyndaǵy kásipkerlik jáne týrızm salasy ókilderimen kezdesip, Úsharal qalasy áýejaıynyń ushý-qoný jolaǵyn jóndeý barysymen tanysty.

Qazirgi tańda áýejaıda ushý-qoný jolaǵyn jóndeý jumystary qarqyndy júrip jatyr.

Áýejaı basshysy Áshirbek Baqytjanovtyń aıtýynsha, atalǵan áýejaı 2018 jyly ashylǵan, jóndeý jumystary byltyr bastaldy, bıyl tolyǵymen aıaqtalady dep josparlanýda.

Osy kúni sondaı-aq, Májilis depýtattary birqatar týrıstik nysandardy aralady.

Atap aıtsaq, Alakól kóli jaǵalaýyn damytýdyń bas josparyna sáıkes sýmen, elektrmen qamtý, káriz júıesin júrgizý qolǵa alynǵan. Bıyl jaǵalaýda 3 iri ınvestıtsııalyq joba júzege asyrylyp, iri demalys oryndary iske qosyldy. Jalpy sany 100-ge jýyq jańa jumys orny ashylyp, jobalarǵa 3 mlrd. teńgege jýyq ınvestıtsııa tartylǵan.

- Alakól – óńirdegi týrıstik áleýeti zor aımaq. Munda jazǵy maýsymda kólge shomylýǵa mıllıonnan astam adam keledi. Sondyqtan óńirdiń týrıstik tartymdylyǵyn odan ári arttyrý úshin kól jaǵalaýyndaǵy ınfraqurylymdy damytý basty mindet. Jerlesterimizden bólek, shet elderden týrıster kelse, ol jetistik» - dep atap ótti Májilis depýtaty Danııar Álimbaev.

Jergilikti bılik ókilderiniń aıtýynsha, bıyl jaǵalaýlardy qorshaý jumystary bastalǵan. Aqshı men Kóktuma aýyldyq okrýgterinde jalpy uzyndyǵy 13,4 shaqyrym jaǵalaý qorshalýǵa tıis. Jobanyń quny 6 mlrd. teńgeni quraıdy.

Bul partııanyń saılaýaldy jol kartasynda kórsetilgen josparlardy júzege asyrý aıasynda uıymdastyrylǵan.

Al Májilis depýtattary, «AMANAT» partııasy fraktsııasynyń músheleri Sergeı Sımonov, Amanǵalı Berdalın jáne Ǵalymjan Eleýov partııanyń Jol kartasy aıasynda Aqtóbede salynyp jatqan kóp qabatty úılerdiń qurylysy alańynda boldy.

Qurylys jumysymen tanysý barysynda Májilis depýtattary qurylys sapasyn, jumys qarqynyn baǵalap, qarajatty ıgerý máselelerin talqylady.

Aıta keteıik, qazir Nur-Aqtóbe shaǵyn aýdanynda 1425 páterli 11 kópqabatty úı salynýda. Jergilikti merdiger «Aqtóbe Sáýlet» JShS 9 qabatty bes paneldi úıdiń qurylysyn qolǵa aldy. Qurylys jumystaryn bıyl aıaqtaý josparlanyp otyr. Jalpy bıyl oblys boıynsha 1 mıllıon 200 myń sharshy metr turǵyn úı paıdalanýǵa beriledi.

Ózekti máselelerdi talqylaý barysynda Májilis depýtattary qurylys materıaldarynyń qymbattaýy jumystyń sapasyna da áser etetinin alǵa tartty.

Amanǵalı Berdalınniń aıtýynsha, jyl saıyn shyǵyndar koeffıtsıentin arttyrý qajettigi týyndaıdy. Shyn máninde, qurylys materıaldary halyqty qoljetimdi turǵyn úımen qamtamasyz etýdiń negizgi tásili bolýy tıis. Al Májilis depýtaty Sergeı Sımonov Úkimet qurylys qarqynyn ótken jyldar deńgeıinde ustap turý úshin tıisti sharalardy qolǵa alyp jatqanyn, qurylys materıaldary baǵasynyń ósýin eskere otyryp, smetalarǵa túzetý júrgiziletinin, ótken jyldan beri toqtap turǵan nysandar boıynsha saraptama júrgiziletinin alǵa tartty.

Májilis depýtattary buǵan deıin Oıyl, Baıǵanın, Mártók aýdandarynda halyqpen kezdesýler ótkizip, jergilikti jerlerdegi ahýalmen tanysqan bolatyn. Olar turǵyndar kótergen mańyzdy máselelerdi zerdelep, Úkimet nazaryn aýdarmaq.

Eske sala keteıik, 14 shildege deıin depýtattar Hromtaý, Áıteke bı aýdany turǵyndarymen kezdespek.