Májilis depýtattary Túrkistan oblysynda etnomádenı birlestikter ókilderimen kezdesti
Basqosýda el birligin nyǵaıtý, qoǵamdyq kelisimdi nasıhattaý baǵytyndaǵy nátıjeli jumystar, aldaǵy maqsat-mindetter talqylandy.
Kezdesý barysynda sóz alǵan QR Parlamenti Májilisiniń depýtaty Meırambek Tólepbergen jıynǵa qatysýshylardy kele jatqan Táýelsizdik kúni merekesimen quttyqtap, azat eldiń egemendik jyldary jarqyn jetistikterdi baǵyndyrǵanyn, barlyq ıgilik pen jetistik birlik, etnosaralyq tatýlyq uǵymdarymen tyǵyz baılanysty ekenin atap ótti.
«Kóne shahar túrki áleminiń rýhanı astanasy atanyp, ásem qalaǵa aınalýda. Bul rette, jańarǵan Túrkistannyń áleýmettik-ekonomıkalyq damýyna Assambleıa músheleri de zor úles qosyp keledi. Aýyl sharýashylyǵy, kásipkerlik, qurylys, saýda salasynda jemisti eńbek etip júrgender jeterlik. Halyq danalyǵynda «Birligi bar el ozady, birligi joq el tozady» degen tereń maǵynaly sóz bar. Bárimiz bir atanyń balasyndaı, bir ózenniń saǵasynda birlese eńbek etsek, tatý tursaq, alynbaıtyn asý bolmaıdy», – dedi halyq qalaýlysy.
Sondaı-aq jıynda QR Parlamenti Májilisiniń depýtaty Fahrıddın Qarataev Assambleıanyń qoǵamdaǵy róline, onyń mán-mańyzdylyǵyna toqtaldy.
«Bárimizdiń maqsatymyz – ortaq, mindetimiz – bir. Assambleıa qurylǵan kúnnen bastap elimizdegi myzǵymas birliktiń uıytqysy, sarqylmas berekeniń bastaýy bolyp keledi. Bul qurylym – elimizdegi tatýlyq pen turaqtylyqtyń eń basty kepili sanalady. Búginde 2 mıllıonnan astam turǵyny bar Túrkistan oblysynda 50-den asa etnos ókilderi bereke-birlikte ómir súrýde. Óńirde qazaq tiliniń eldi biriktirýshi retindegi róli de artýda, bul Táýelsizdigimizdiń tuǵyryn myǵymdaı túseri sózsiz. Aldaǵy ýaqytta da jer-jerde, kórshiles aýyldarda dostyq pen tatýlyqty dáripteıtin is-sharalardy jandandyryp, jıi ótkizýimiz qajet. Bul – el bolyp uıysýymyzǵa, memlekettiligimizdiń mereıin asqaqtatýǵa úlken septigin tıgizeri anyq», – dedi depýtat.
Sonymen qatar, kezdesýde Túrkistan oblystyq Qazaqstan halqy Assambleıasy janyndaǵy Ǵylymı-sarapshylyq top jetekshisi, Q.A. ıAsaýı atyndaǵy HQTÝ-niń oqytýshysy, PhD doktor Q.Qaldybaı, Kentaý qalalyq máslıhatynyń depýtaty, Kentaý qalalyq Analar keńesiniń múshesi, S.Qojanov atyndaǵy №9 mektep dırektory U.Musahanova, Túrkistan oblystyq tájik etnomádenı birlestiginiń múshesi F.Faızıddınov sóz sóılep, el birligin nyǵaıtýǵa qatysty pikirlerin bildirdi. Jıynǵa qatysýshylar suraq-jaýap túrinde oı bólisip, pikir almasty.
Kezdesý barysynda jyl boıy belsendi qyzmet atqarǵan, óńirdegi birlik pen tatýlyqtyń nyǵaıýyna aıryqsha úles qosqan birqatar azamattar Qazaqstan halqy Assambleıasy tóraǵasy orynbasary M. Ázilhanovtyń Alǵys hatymen marapattaldy. Jıyndy qorytyndylaǵan basqarma basshysy Ańsar Óserbaev halyqtyń birligin nyǵaıtýda jáne qoǵamdyq kelisimdi saqtaýda júıeli jumystar jalǵasatyndyǵyn atap ótti.
Aıta keteıik, keshe depýtattar etnosaralyq tatýlyqty nyǵaıtý baǵytynda Saıram aýdanyndaǵy Aqsýkentte jáne Qarabulaqta, sondaı-aq búgin Saýran aýdanynda turǵyndarmen kezdesýler ótkizdi.