Májilis depýtattary Syr óńirinde aýyl sharýashylyǵy salasynyń ókilderimen kezdesti

NUR-SULTAN. QazAqparat - Májilis depýtattary óńirlerdegi sapar barysynda Qyzylorda oblysyna bardy, dep habarlaıdy QazAqparat QR Parlamenti Májilisiniń baspasóz qyzmetine silteme jasap.

Májilis tóraǵasynyń orynbasary Balaıym Kesebaeva Ekologııa, geologııa jáne tabıǵı resýrstar mınıstrliginiń vıtse-mınıstri Serik Qojanııazovpen birge Jańaqorǵan aýdanyndaǵy Kelintóbe magıstraldy kanalyn tazalaý jumysyn kózben kórip, aýdandaǵy aýyl sharýashylyǵy taýarlaryn óndirýshilermen kezdesti.

Sapar barysynda Shıeli magıstraldi kanalynan Qamystyqaq kanalyna nasos qondyrǵysy arqyly qosymsha sý berý jumystarymen tanysyp, júzege asyrylýy tıis jobalardy talqylady. Sonymen qatar depýtattar osy óńirdegi sharýa qojalyqtarynyń ıelerimen kezdesip, pikir alysty.

Kezdesýde kásipkerlik, aýyl sharýashylyǵy daqyldaryn sýarmaly sýmen qamtamasyz etý, egin egý maýsymyna daıyndyq, sýdy únemdeý, sýdy kóp talap etetin daqyldardy qysqartý jáne aýyl sharýashylyǵyndaǵy sýbsıdııalaý máseleleri kóterildi.