Májilis depýtattary sý tasqynynan zardap shekkenderge gýmanıtarlyq kómek kórsetti

NUR-SULTAN. QazAqparat – QR Parlamenti Májilisiniń depýtattary, «AMANAT» fraktsııasynyń músheleri Amanǵalı Berdalın men Ǵalymjan Eleýov is-saparmen Aqtóbe oblysyna baryp, tasqyn sýdan zardap shekken eldimekenderdiń turǵyndarymen kezdesti, dep habarlaıdy QazAqparat tilshisi.

Májilis depýtattary azamattardy mektep ishinde ýaqytsha ashylǵan evakýatsııalyq pýnktte qabyldady.

«Biz Aqtóbe óńirindegi jaǵdaıdy óz kózimizben kórip, zardap shekken turǵyndarmen kezdesý úshin elordadan arnaıy keldik. Jergilikti atqarýshy organdarmen únemi baılanystamyz. Zardap shekken otbasylarǵa tıisti kómek kórsetiledi. Bul jaǵdaı Májilis depýtattarynyń jiti baqylaýynda bolady», - dedi A.Berdalın.

Sondaı-aq, depýtattar óz attarynan júk kóligimen azyq-túlik, balalar tamaǵy, kıim-keshek jáne dári-dármek syndy asa qajetti kerek-jaraqtar boıynsha gýmanıtarlyq kómek jetkizdi. Oryn alǵan jaǵdaıǵa baılanysty halyqty sabyrǵa shaqyra otyryp, Úkimetpen, jergilikti bılik ókilderimen birlesip, tıisti sharalar qolǵa alynatynyn aıtty.

Depýtattar Aqtóbe, Sazdy, Qarǵaly sý qoımalarynda bolyp, tasqyn shaıyp ketken nysandardy aralap, qalpyna keltirý, aldyn-alý máselelerin talqylady.

Aıta keteıik, aldyn-ala aqparatqa qaraǵanda, sý tasqyny bastalǵan merzim ishinde Aqtóbe oblysy boıynsha barlyǵy 119 úıdi sý basqan. Onyń ishinde 41-i turǵyn úı bolsa, 78-i saıajaı. 300 den astam adam apattan qutqarylyp, qaýipsiz oryndarǵa kóshirildi.