Májilis depýtattary óńir turǵyndarymen kezdesti

NUR-SULTAN. QazAqparat - Májilis depýtattary óńirlerde jumysyn jalǵastyryp, oblys, aýdan ortalyqtaryn aralap, eńbek ujymdarymen, aýyl turǵyndarymen kezdesýler ótkizýde, dep habarlaıdy QazAqparat Májilistiń baspasóz qyzmetine silteme jasap.

Onda halyqty áleýmettik qoldaý sharalaryna, memlekettik baǵdarlamalardy jergilikti jerlerde júzege asyrý máselelerine basa nazar aýdarýda.

Búgin Májilis depýtaty Janarbek Áshimjanov Almaty oblysynyń Esik qalasynda «AMANAT» partııanyń saılaýaldy baǵdarlamasynyń oryndalýyn júzege asyrýdyń Jol kartasy sheńberinde salynyp jatqan 60 páterli 2 turǵyn úıdiń qurylysymen tanysty.

Kezdesýde J.Áshimjanov qazaqstandyqtardyń ómir súrý deńgeıin arttyrý jónindegi memlekettik sharalar týraly, onyń ishinde depýtattardyń áleýmettik máselelerdi sheshýge baǵyttalǵan zańnamalyq bastamalary týraly aıtty. Sonymen qatar nysandaǵy qurylys jumystarynyń sapasy ýákiletti organdardyń qatań qadaǵalaýynda bolýy tıis ekenin de atap ótti.

Óz kezeginde qurylys kompanııasynyń ókili Bolat Ishnazarov qazirgi ýaqytta qurylys jumystary 95%-ǵa aıaqtalǵanyn, abattandyrý jumystary bitkennen keıin turǵyn úıler merziminde paıdalanýǵa beriletinin aıtty.

Jalpy Esik qalasynda kezekte turǵan turǵyndarǵa bıylǵy jyldyń tórtinshi toqsanynda 120 páter paıdalanýǵa beriledi dep josparlanǵan.

Sonymen qatar Májilis tóraǵasynyń orynbasary Pavel Kazantsev, Májilis depýtaty Eldos Abaqanov «AMANAT» partııasynyń ókilderimen birge Nur-Sultan qalasyndaǵy «Zarechnyı» turǵyn alabynyń turǵyndarymen kezdesti. Onda talqylanǵan basty másele mektep qurylysy týraly boldy. Elordanyń qarqyndy damyp kele jatqanyna qaramastan, Zarechnyı alabynda áli kúnge deıin mektep salynbaǵan. №45 orta mekteptiń salynǵanyna 34 jyl bolǵan. Búginde 400 balany ǵana qamtı alatyn mektepte 800-ge jýyq bala bilim alýda. «Kezdesýde birqatar qalalyq, tipti respýblıkalyq deńgeıdegi máseleler kóterildi. Qalalyq deńgeıdegi problema – ol qurylys, kóshelerdi keńeıtý, kommýnıkatsııalyq máseleler jáne t.b. Barlyq máselelerdi jazyp aldyq, baqylaýǵa alamyz», – dedi Májilis vıtse-spıkeri Pavel Kazantsev.

Májilis tóraǵasynyń aıtýynsha, turǵyndar tarapynan kóterip jatqan suraqtardyń basym bóligi jergilikti atqarýshy organdardyń deńgeıinde sheshiletin másele. Óz kezeginde Eldos Abaqanov: «Eń kóp kóterilgen suraq - «mektep qashan salynady?». Mektep bul aýdanǵa árıne jetkiliksiz, odan bólek mektepaldy daıarlyq klasstarynda jaýyp tastaǵan. Bizdiń maqsat – barlyq problemalardy tikeleı estip, olardyń sheshý joldaryn oılastyrý. Ár suraq boıynsha jeke-jeke jumys jasaıtyn bolamyz. Kezdesý aıasynda aıtylǵan jáne olardyń sheshý joldary baqylaýǵa alynatyn bolady», – dedi.

Turǵyndar depýtattarǵa aýdandaǵy salynyp jatqan turǵyn úı keshenderiniń sany mektep pen balabaqshalarǵa saı bolýy kerek degen pikirlerin aıtty.