Májilis depýtattary Munaıly aýdanynda boldy
Depýtattar oblystaǵy saparlary barysynda Munaıly aýdanynyń Qyzyltóbe aýylyndaǵy «Shlıýmberje» mega-bazasynyń jumysymen tanysty.
Halyq qalaýlylary Joldaýdyń basym baǵyttaryna, onyń ishinde áleýmettik qamsyzdandyrý salasyna basa nazar aýdardy. Atap aıtqanda, zeınetaqy, jalaqy, densaýlyq saqtaý, bilim berý salalarynyń qoljetimdiligin arttyryp, azamattardyń ál-aýqatyn jaqsartýǵa erekshe mán berildi.
Shlıýmberje kompanııasy álemniń 80-ge jýyq elderinde isteıtin, 140 túrli ulttan turatyn 100 myńǵa jýyq jumyskerleri bar dúnıejúzilik iri munaı salasyndaǵy qyzmet kórsetý korporatsııasy. Shlıýmberje seısmıkalyq aqparat pen formatsııanyń damýy protsesi, uńǵy testi men týra burǵylaý, uńǵy tsementteý men qozdyrý, jasandy kóterý, uńǵyny aıaqtaý jáne konsaltıng, baǵdarlamalar men aqparatty basqarý sııaqty keń aýqymdy ónimder men qyzmetter usynady.
Búgingi tańda kompanııanyń Mańǵystaý oblysyndaǵy bazasynda 300-ge jýyq adam eńbek etýde.
Kezdesýde eńbek ujymy halyq qalaýlylaryna óz-usynystaryn bildirip, pikir almasty.
Sonymen qatar búgin Májilis depýtattary Serik Úmbetov, Baqytjan Ertaev, Zaǵıpa Balıeva, Nurlan Dýlatbekov, Jeksenbaı Dúısebaev Almaty oblysyndaǵy saparlary barysynda Talǵar aýdanyndaǵy Keńdala aýylynyń turǵyndarymen kezdesti.
Kezdesýdiń basty maqsaty - Memleket Basshysy N.Nazarbaevtyń halqyna arnalǵan Joldaýyn halyq arasynda keńinen nasıhattaý jáne túsindirý.
«Bıylǵy Joldaý osyǵan deıin júzege asyrylyp jatqan strategııalyq bastamalardyń zańdy jalǵasy. Halqymyzdyń ál-aýqatyn, turmys sapasyn arttyrýǵa baǵyttalǵan ózekti máseleler naqty sheshimin tabatyn bolady. ıAǵnı, ár otbasynyń, árbir adamnyń jaǵdaıyn, tirshilik ortasyn jaqsartýǵa arnalǵan. Elbasynyń dástúrli Joldaýynda bilim berý, densaýlyq saqtaý, kásipkerlikti damytý, sybaılas jemqorlyqpen kúres, quqyq qorǵaý organdarynyń jumysyn jetildirý, memlekettik qyzmettiń tıimdiligin kóterý sııaqty kúndelikti ómirdegi máselelerge erekshe mán berilip otyr», - dedi depýtat Nurlan Dýlatbekov.
Kezdesýde Talǵar qalasyndaǵy №1 orta mektep dırektory Zamzagýl Mýshrapılova ustazdar qaýymynyń bedelin kóterýge qatysty pikir bildirse, aýyl jastary da «Jastar jylyna» baılanysty keler jylǵa josparlanǵan sharalar týraly aıtty.
- Elbasy Joldaýynyń ár tarmaǵy halyqtyń áleýmettik ál-aýqatyn kóterip, tabysy men turmysyn jaqsartýǵa baǵyttalǵan. Biz bul jumysty birlesip jasaýymyz kerek. Aýyl turǵyndarynyń áleýetin kóterý, jastarǵa demeý kórsetip, bolashaǵyna durys baǵyt-baǵdar bersek qana, egemen elimizdiń tuǵyry bekem, tirshiligi beıbit bolmaq. Elbasy usynǵan «Aýyl - el besigi» jobasy Keńdala aýylynyń turǵyndarynyń kóńilinen shyqty. Biz joba aıasynda keler jylǵa qoıǵan maqsat mindetterimiz kóp, azamattarymyzdyń qoldaýy da bar, - dedi Keńdala aýylynyń ákimi Almas Ómirzaqov.
Aýyl turǵyndary birqatar ózekti áleýmettik máselelerdi kóterip, aıtylǵan barlyq usynys-pikirler Májilis depýtattarynyń nazaryna alyndy.
Osy kúni Májilis depýtattary G. Bıjanova, V.Qaınazarov, K.Musyrman jáne B. Smaǵul Jambyl oblysyndaǵy Moıynqum, Qordaı, Shý aýdandaryn aralap, aýyldardaǵy túıtkildi máselelermen tanysty.
Jambyl aýdany, Asa aýylyndaǵy «Jastar resýrstyq ortalyǵynda» aýdan jastarymen kezdesken depýtattar jastarǵa arnalǵan «Bastaý - bıznes», «Qoljetimdi baspana «7-20-25» baǵdarlamalary týraly aıtty.
Májilismender Joldaýdan týyndaǵan jańa mindetter jóninde jastarmen pikir almassa, óz kezeginde aýdan jastary aýyldyq okrýgtegi jastar isi jónindegi nusqaýshylardyń qysqarýy múmkin ekendigine alańdaýshylyq bildirip, aýdandaǵy jastar salasyna qatysty týyndap otyrǵan birshama máselelerdi kóterdi.
Jambyl oblystyq «Jas Otan» Jastar qanaty tóraǵasynyń orynbasary B. Dalabaev jastardyń ishinde álsiz toptar, múgedekter, jetimder bar ekenine, olardyń qoldaýdy qajet etetinin, jastardyń tómen aılyqqa kelmeıtinine, bir kúndik tabyspen ómir súrip jatqanyn jáne osy sııaqty basqa da ózekti máselelerdi aıtty.
Jastardy tolǵandyrǵan bul saýaldarǵa Májilis depýtattary jan-jaqty jaýap berip, atalǵan usynystardy Parlament qabyrǵasynda kóterip, nazarlaryna alatyndaryn jetkizdi.