Májilis depýtattary Lısakovsk qalasyndaǵy ózekti problemalardy talqylady

QOSTANAI. QazAqparat - Májilis depýtattary – «Nur Otan» partııasy fraktsııasynyń músheleri Albert Raý, Samat Aqyshev, Álııa Saparova jáne Ekaterına Smyshlıaeva Qostanaı oblysyna baryp, Lısakovsk qalasyndaǵy «Qazaqstan alıýmınııi» AQ eńbek ujymymen kezdesti. Bul týraly QazAqparat tómengi palatanyń baspasóz qyzmetine silteme jasap habarlaıdy.

Depýtattar eldegi áleýmettik-ekonomıkalyq jaǵdaı týraly jáne olardyń halyq aldyndaǵy bergen mindettemelerin oryndaý jaıly baıandap, respýblıkalyq jáne oblystyq bıýdjetten qarjylandyrylatyn óńirlik jobalar jaıynda aıtty.

- Bıyldyń ózinde respýblıkalyq bıýdjetten Lısakov qalasy úshin ınvestıtsııalyq baǵdarlama 2 mlrd teńgeden astam qarjyny quraıdy. Bul qarajatqa jylý trassalary, sý qubyrlary jóndeledi. Aldaǵy ýaqytta Valerıanovka aýylyna baratyn sý qubyrynyń ekinshi jelisi aýystyrylady. Bul josparlardyń barlyǵy saılaýaldy baǵdarlamada jazylǵan. Ár aýylda tez arada sheshýdi qajet etetin máseleler bar. Qazir biz osy baǵytta jumys istep jatyrmyz, - dedi A.Raý.

Kezdesý barysynda qostanaılyqtar sońǵy 2 jylda joldar jóndelgenin atap ótip, biraq Oktıabr jáne Lısakov kentterin bólip turǵan 3 temir jol ótkeli nazardan tys qalǵanyn aıtty. Sonymen qatar Oktıabrskıı kentiniń turǵyndary Tobyl ózenin tazartý jáne jaǵajaıdy jaılastyrý máselesin qarastyrýdy surady.

Depýtattar turǵyndar tarapynan aıtylǵan usynys-pikirlerdi nazarǵa alyp, máselelerdi baqylaýǵa alǵanyn atap ótti.