Májilis depýtattary Kókshetaýdaǵy sút zaýytynyń jumysymen tanysty

KÓKShETAÝ. QazAqparat - QR Parlamenti Májilisiniń depýtattary Ersultan Bekturǵanov, Janat Jarasov, Jeksenbaı Dúısebaev, Sapar Ahmetov jáne Mıhaıl Cherıkov jumys saparymen Kókshetaýda bolyp, birqatar áleýmettik-óndiristik nysandardyń jumysymen tanysty, dep habarlaıdy «QazAqparat» HAA tilshisi.

Oblys ortalyǵyndaǵy irgeli kásiporyndardyń birinen sanalatyn «Moloko sınegore» jaýapkershiligi shekteýli seriktestiginde bolǵan halyq qalaýlylary zaýyt ujymymen kezdesip, sút óndirý protsessimen tanysty. 2010 jyldan beri jumys istep kele jatqan «Moloko Sınegorıa» sút zaýytynda irimshik, maı, qaımaq jáne sút ónimderiniń birneshe túri shyǵarylady. Ónim­niń barlyǵy tabıǵı shıkizattan da­ıyndalatyndyqtan, sapasy da joǵary. Kásiporyn aldaǵy ýaqytta shetelge sút ónimderin eksporttaýdy josparlap otyr.

 

Sút zaýytynyń dırektory Elena Moskovetstiń aıtýynsha, zaýyt ýltrapasterlengen A3/Flex sútin óndirý boıynsha eki birdeı tehnologııalyq jelimen jabdyqtalǵan. Zaýyttyń qýaty táýligine 16 tonna sút óńdeýge jetedi. Jaqynda zaýytta taǵy bir  joǵary temperatýrada sút óńdeıtin jeli iske qosyldy. Sondaı-aq, aldaǵy ýaqytta shvedterdiń ádisi boıynsha qyshqyl sút ónimderin,  grekterdiń ádis boıynsha «Stefart» ıogýrtyn, fınderdiń ádisi boıynsha japsyrma qaǵazyn jáne kólemi 1-2 lıtrli shısha shyǵaratyn jańa jelilerdi iske qosý josparlanǵan.  

 

«Kásiporynnyń qazirgi zamanǵy ozyq tehnologııalyq ádisti qoldanýy óndiris kólemin edáýir arttyryp, joǵary sapaly ónim shyǵarýǵa múmkindik berýde. Ónim negizinen Astana, Aqmola oblysynyń aýdandary men elimizdiń ózge oblystaryna jáne Reseıge shyǵarylady», - dedi Elena Moskovets óz sózinde.
Jumysshylarmen júzdesip, óndiris týraly áńgimelesken depýtattar elimizde otandyq ónim óndirýge erekshe kóńil bólingenin aıta kele, qazirgi álemdik daǵdarys jaǵdaıynda elimizge otandyq óndiris, óńdeý ónerkásibin jandandyryp, sol arqyly ekonomıkany damytý úshin naqty qadamdar jasaýǵa túbegeıli bet burý mindeti qoıylyp otyrǵanyn atap ótti.