Májilis depýtattary Kentaý qalasyna bardy

TÚRKІSTAN. QazAqparat - Májilis depýtattary Qaınar Abasov jáne Syrym Ertaev aımaqtarǵa sapar barysynda Túrkistan oblysynyń Kentaý qalasyna bardy. Bul týraly QazAqparat Májilistiń baspasóz qyzmetine silteme jasap habarlaıdy.

Onda transformator zaýytynyń ujymymen kezdesip, jumysshylardyń usynys-pikirlerin tyńdady.

Kezdesý barysynda «Kentaý trasformator zaýyty» AQ-nyń basqarma tóraǵasy Haırýlla Qojabaev depýtattarǵa «jańa stanoktar men mashınalar alýǵa memleketten jeńildetilgen nesıe qarastyrylsa, monoqalalardy damytý baǵdarlamasy arqyly 1 paıyzdyq nesıe berilse» degen usynysyn jetkizdi.

Sonymen qatar, óndiris ornynyń jumysshylary zaýyttarda aýyr jumys isteıtin áıelderdiń zeınet jasyn tómendetý týraly tilekterin aıtty.

Óz kezeginde depýtat Q. Abasov atalǵan usynystardy nazarǵa alatynyn jetkizip, zeınet jasyn tómendetý máselesi tereń saraptaýdy qajet etetinin, saılaýshylardyń talaptary boıynsha izdenip, jumys júrgizetinin málimdedi.

«Partııanyń Saılaýaldy baǵdarlamasyn oryndaý arqyly aldaǵy 5 jylda elimizdegi belsendi eksporttaýshy kompanııalar sanyn 400-den 1000-ǵa deıin arttyrý kózdelip otyr. Sonymen birge shıkizattyq emes eksportty 2,5 ese arttyrý jospary bar. Aýyldardy aralaý barysynda kásipkerler tarapynan osy baǵytta usynystar men ótinishter jıi aıtyldy. Ásirese, pandemııa saldarynan jumysy toqtap qalǵan kásiporyndarǵa memlekettik qoldaý asa qajet. Biz kásiporyndardy nesıelendirý barysyn jandandyrý úshin Parlamentte tıisti usynystar joldaımyz», – dedi Syrym Ertaev.

Jalpy Májilis depýtattary oblysta qoǵamdyq qabyldaýlar ótkizip, «Nur Otan» partııasynyń saılaýaldy baǵdarlamasynyń Jol kartasynyń oryndalý barysyn saralady. Aldaǵy ýaqytta baǵdarlamany oryndaý boıynsha óńirdegi ózekti máselelerdi sheshý jolynda jumystar jalǵasyn tabady.