Májilis depýtattary GMO ónimderin Qazaqstanǵa kirgizbeý tetikterin qurýdy usyndy
Osy oraıda Úkimet basshysy Asqar Mamınniń atyna depýtattyq saýal joldandy, dep habarlaıdy QazAqparat tilshisi.
«Qazirgi kezde EAEO-nyń barlyq elinde genetıkalyq túrlendirilgen organızmderge (GMO) jáne olardan jasalǵan ónimderge qatysty jalpy saıasat qalyptastyryldy. Gendik ınjenerııa negizinde alynǵan aýyl sharýashylyǵy ósimdikteriniń tuqymdaryn satýǵa jáne egý úshin paıdalanýǵa zań júzinde tyıym salynǵan. Quramynda GMO kóp kezdesetin ımporttyq ónimder túrli shekteýler men tyıymdardyń kómegimen odaq aýmaǵynan júıeli túrde shyǵarylýda», - dedi depýtat Aıqyn Qońyrov.
Onyń aıtýynsha, EAEO aýmaǵynda quramynda GMO bar aýylsharýashylyq ónimderin óndirý jaǵdaılary tirkelip jatyr. Ol jartylaı fabrıkattar men tamaq ónimderin óndirýde qoldanylyp otyr.
Qytaı Halyq Respýblıkasynyń Bas keden basqarmasy 2020 jyldyń shildesinde Reseı Federatsııasynyń «Rosselhoznadzor» mekemesine Reseı rapsynyń 23 partııasynda, sondaı-aq soıa maıynyń 10 partııasynda GMO komponentteriniń tabylǵany týraly habarlady. Joǵaryda aıtylǵandardy eskere otyryp, «Qazaqstannyń Halyq partııasy» fraktsııasy Úkimettiń nazaryn Reseı Federatsııasy aýmaǵynda GMO tuqymdary men daıyn ónimderiniń aınalymyna qatysty baqylaýdyń jetkiliksizdigine aýdaryp otyr.
«Bizdiń oıymyzsha, saýda seriktesteri aldyndaǵy óz mindettemelerin oryndamaý aýyl sharýashylyǵy taýarlaryn óndirýshiler men halyq úshin tikeleı qater tóndiredi. Osyǵan baılanysty Eýrazııalyq ekonomıkalyq komıssııanyń alańynda GMO-ǵa qatysty problemany kóterýdi jáne GMO tuqymdarynyń enýin, qoldanylýyn jáne daıyn ónimdi EAEO aýmaǵynan Qazaqstanǵa ótkizýdi boldyrmaý úshin qosymsha Ulttyq qorǵaý tetikterin qurýdy usynamyz», - dedi Aıqyn Qońyrov.