Májilis depýtattary BQO-daǵy jumys saparyn mektepten bastady

ORAL. QazAqparat  -  Májilis depýtattary Aızada Qurmanova, Aıgúl Nurkına, Jámıla Nurmanbetova, Svetlana Bychkova jáne «Aqjol» partııasy fraktsııasynan Keńes Ábsatyrov Oral qalasyndaǵy №47 orta mektep jumysymen tanysty, dep habarlaıdy QazAqparat tilshisi.

Memleket basshysy 5 qazan kúni Joldaýyn jarııalaǵan kezde úsh aýysymda oqytatyn jáne apattyq jaǵdaıdaǵy mektepter máselesine arnaıy toqtalyp, ony sheshý úshin Úkimetke 2019-2021 jyldarǵa arnalǵan bıýdjetten qosymsha 50 mrld teńge bólýdi qarastyrýdy tapsyrǵan bolatyn.

Depýtat Jámıla Nurmanbetovanyń aıtýynsha, qazirgi tańda elimizde 127 úsh aýysymdyq, 44 apatty mektep bar. Naqty aıtqanda, 124 myń oqýshyǵa oryn jetispeıdi. Sonyń ishinde BQO-da 5 úsh aýysymdy, sonshama apatty mektep bar. Bul - 2163 oqýshyǵa oryn jetpeıdi degen sóz.

«Elbasy tapsyrmasyna sáıkes bul máseleni keshendi túrde sheshý qajet. Qurylysy kelesi jyly jalǵasatyn bilim ordalaryn qosa alǵanda, 94 úsh aýysymdyq, 36 apattyń mekteptiń máselesi ózekti kúıinde qalyp otyr. Kóp jaǵdaıda jergilikti atqarýshy organnyń qurylys salý jónindegi ótinishteri respýblıkalyq bıýdjet komıssııasy tarapynan negizsiz dep eseptelinedi nemese qabyldanbaıdy. Sondyqtan bul máseleni jergilikti ákimshilik naqtylap, mınıstrlikpen birge sheshýi kerek», dedi J.Nurmanbetova.

Oblystyq bilim basqarmasynyń basshysy Sholpan Qadyrovanyń keltirgen málimetterine qaraǵanda, Oral qalasynda jalpy orta bilim beretin 50 mektep bolsa, sonyń 10-y ınnovatsııalyq baǵytta, bireýi - keshki mektep. Sonyń ishinde 23-i qazaq, 14-i orys, 13-i qazaq jáne orys tilderinde oqytady. Sońǵy kezde Zachagan kentinde (№47 mektep te osynda ornalasqan) halyq kóp qonystanyp jatqandyqtan, bul aýdanǵa áli eki mektep qajet.

№47 orta mektep dırektory Natalıa Erǵojıevanyń sózine qaraǵanda, munda 180 muǵalim dáris beredi. Bári derlik jańartylǵan kýrstan ótken. Alaıda oqýshy sanynyń kóptigi qıyndyq týdyrýda. Basqasyn aıtpaǵanda, 90 synyptyń dene shynyqtyrý sabaǵynyń 1 sport zalynda ótýi qolaısyz. Jańa mektep salynsa, biraz másele sheshilip qalar edi.

Májilis depýtattary jumys sapary barysynda jergilikti jerdegi jaǵdaımen naqty tanysyp, kókeıkesti máselelerdiń sheshilýine barynsha yqpal etetindikterin jetkizdi.

Aıta keteıik, ótken aptada Senat depýtattary Birǵanym Áıtimova, Erbolat Muqaev jáne Narıman Tóreǵalıev Elbasy Joldaýynda aıtylǵan tapsyrmalarǵa baılanysty Oral qalasy men oblystyń birneshe aýdanynda bolyp, eldiń jaı-kúıimen tanysqan edi.

Bul joly Májilis depýtattary Oralda ǵana emes, sondaı-aq Aqjaıyq, Jańaqala, Bórli, Shyńǵyrlaý aýdandaryn aralap, turǵyndardyń usynys-tilekterine de qulaq túretin bolady.