Májilis depýtattary birqatar qylmystyq teris qylyqtarǵa jazany jeńildetpek

NUR-SULTAN. QazAqparat - QR Parlamenti Májilisiniń depýtattary birqatar qylmystyq teris qylyqqa jazany jeńildetýge nıetti. Bul týraly búgin QR Ádilet mınıstrliginde ótken Zań jobalaý qyzmeti máseleleri jónindegi vedomstvolyq komıssııa otyrysynda Májilis depýtaty Magerram Magerramov aıtty, dep habarlaıdy QazAqparat tilshisi.

M.Magerramov komıssııa múshelerine Májilis depýtattary bastamashylyq jasaǵan «QR Qylmystyq kodeksine jáne keıbir zańnamalyq aktilerge ózgerister men tolyqtyrýlar engizý týraly» zań jobasyn tanystyrǵan bolatyn.

Onyń aıtýynsha, usynylyp otyrǵan túzetýler sanktsııalardy jeńildetýdi, erkin aınalymnan alynǵan zattar tizbesin keńeıtýdi, keıbir áreketti qylmystyq teris qylyqtan alyp tastap, ákimshilik quqyq buzýshylyq sanatyna jatqyzýdy kózdeıdi.

«Qylmystyq kodekstiń 187-baby 1-tarmaǵyndaǵy kishigirim urlyq úshin kózdelgen sanktsııany jeńildetýge qaraı ózgertýdi usynamyz. Qazirgi ýaqytta atalǵan baptyń 1-tarmaǵy úshin 80 aılyq eseptik kórsetkishke deıingi kólemdi aıyppul qarastyrylǵan. Al tájirıbe 187-bap boıynsha qylmystyq teris qylyq jasaý barysynda sot salatyn aıyppuldan shyǵyn kóleminiń aıtarlyqtaı az bolatynyn kórsetip otyr. Osyǵan oraı, keltirilgen shyǵynnyń 10 eselengen kóleminde aıyppul belgileý arqyly jaza taǵaıyndaý bóliginde ózgeris engizýdi usynamyz», - dedi M.Magerramov.

Komıssııa otyrysyna qatysqan QR Іshki ister mınıstriniń orynbasary Rashıd Jaqypov bul zań jobasyn Úkimet tarapy qoldap otyrǵanyn, degenmen keı máselelerge qatysty eskertýler men túzetýler bar ekenin aıtty.