Májilis depýtattary «Baıqońyr» keshenin jalǵa berýge qatysty qujatty talqylaıdy

NUR-SULTAN. QazAqparat – Parlament Májilisi depýtattary «1994 jylǵy 10 jeltoqsandaǵy Qazaqstan Respýblıkasynyń Úkimeti men RF Úkimeti arasyndaǵy «Baıqońyr» keshenin jalǵa berý shartyna ózgeris engizý týraly hattamany ratıfıkatsııalaý týraly» zań jobasy boıynsha talqylaýdy bastady, dep habarlaıdy QazAqparat tilshisi.

Májilistiń Halyqaralyq ister, qorǵanys jáne qaýipsizdik komıtetiniń tóraıymy, depýtat Aıgúl Quspan «1994 jylǵy 10 jeltoqsandaǵy Qazaqstan Respýblıkasynyń Úkimeti men RF Úkimeti arasyndaǵy «Baıqońyr» keshenin jalǵa berý shartyna ózgeris engizý týraly» hattama 2018 jylǵy 9 qarashada Petropavl qalasynda jasalǵanyn eske saldy.

«Hattamanyń maqsaty – eki el úkimetteri arasyndaǵy jasalǵan sharttyń tórtinshi babyna Reseıdiń «Baıqońyr» keshenin jalǵa alý merzimin 2050 jylǵa deıin uzartý boıynsha ózgeris engizý. Komıtet osy zań jobasyn jumysqa alýǵa, ol boıynsha 2021 jylǵy 5 qazanǵa deıingi merzimde qorytyndyny ázirleýge daıyn», - dedi A. Quspan Májilistiń jalpy otyrysynda.

Eske sala keteıik, 2018 jyly Petropavl qalasynda Qazaqstan men Reseıdiń Óńiraralyq yntymaqtastyǵynyń XV forýmynda birqatar qujatqa qol qoıyldy.