Májilis depýtattary aýyl jastarynan qurylǵan eńbek brıgadasymen kezdesti

ASTANA. QazAqparat – Búgin Májilis depýtattarynyń óńirlerge sapary bastaldy, dep habarlaıdy QazAqparat QR Parlamenti Májilisiniń baspasóz qyzmetine silteme jasap.

Baspasóz qyzmetiniń málimetterine qaraǵanda, Májilistegi «AMANAT» partııasy fraktsııasynyń músheleri Marhabat Jaıymbetov pen Murat Ergeshbaev Qyzylorda oblysy, Syrdarııa aýdanynda bolyp, partııanyń saılaýaldy baǵdarlamasy aıasynda salynyp jatqan áleýmettik nysandardy aralady.

Sapar barysynda Aıdarly eldi mekeninde egin dalasynda jumys istep jatqan aýyl jastarynan qurylǵan eńbek brıgadasy múshelerimen kezdesti. Eńbek brıgadasy 2019 jyly 15 jastyń birigýimen respýblıkada alǵashqylardyń biri bolyp qurylǵan.

Oblys ákiminiń qoldaýymen aýdandaǵy jastardyń jumyssyzdyq deńgeıin tómendetý maqsatynda aýdanǵa qarasty 7 aýyldyq okrýgten (Shirkeıli, Aıdarly, A.Toqmaǵanbetov, Amankeldi, Besaryq, Jetikól, Qoǵalykól a/o) jastar brıgadalary qaıta quryldy.

Búginde eńbek brıgadalary qatarynda jumyssyz, NEET sanatyndaǵy, probatsııa esebinde turatyn 200-ge jýyq jastar jumys isteıdi. Aýyl jastaryna memleket tarapynan qoldaý kórsetilgen. Máselen, tegin ýaqytsha jer berilip, demeýshilik esebinen jer jyrtý, egin alqabyn qorshaý jáne janar-jaǵarmaı otynymen tolyqqandy qamtamasyz etilgen. Aýdannyń eńbekqor jastary búginde 35 gektar kartop daqylyn jáne 25 gektar jerge baqsha daqyldaryn egip otyr.

Jıynda jastar brıgadalarynyń músheleri depýtattarǵa ózderin tolǵandyrǵan máselelerin kóterip, suraqtaryn qoıdy.

Óz kezeginde depýtattar jastarǵa «Aýyl amanaty», «Jer amanaty» partııalyq jobalary aıasynda aýyl jastaryna bos jatqan jerlerdi tıimdi ıgerý turǵysynan jan-jaqty qoldaý kórsetilý kerektigin atap ótti.