Májilis depýtattary Atyraýda turǵyndarmen ózekti máselelerdi talqylady
Májilis depýtattary Dúısenbaı Turǵanov jáne Nurlybek Ojaev Atyraý oblysynyń Isataı aýdanyna jumys saparymen bardy.
Onda 2022 jyldyń sońyna deıin aıaqtalýǵa tıis «Atyraý-Astrahan» kúre jolynyń qurylysymen tanysty.
Pandemııa kezinde jol salý jumystary toqtamaǵanymen, jergilikti turǵyndardyń aıtýynsha, qurylys baıaý júrýde.
Májilis depýtattary osy máseleniń jaı-japsarymen tanysyp, qurylys jumystaryn júrgizip jatqan mekeme ókilderimen júzdesti.
Aıta ketý kerek, qazir 277 shaqyrym joldyń 53 %-ten astam bóligi aıaqtalǵan.
Óz kezeginde depýtat N.Ojaev:
- Qazirgi ýaqytta el ishi qaýipti indetten zardap shegip otyrǵanda, jol salý jumystarynyń toqtamaı júrgizilýi kóńilge qýanysh uıalatady. Dese de, bul másele halyqtyń kóp jyldan beri ábden shymbaıyna batqany da belgili. Sebebi, jol - el men eldi, aýyl men aýyldy qatynastyratyn negizgi kórsetkishtiń ajyramas bóligi. Sol úshin de mańyzy men máni bıik osy jol qurylysynyń sapaly júrgizilip, ýaqytyly aıaqtalýy basty nazarda bolady, - dedi.
Sapar barysynda halyq qalaýlylary Isataı aýdanynyń ortalyǵy Aqqystaý aýylynda turǵyndarmen júzdesip, olardyń ótinish-tilekterin tyńdady.
Turǵyndar ekologııalyq máselelerdi ortaǵa salyp, usynystaryn da jetkizdi.
Qazir aýdan sý tapshylyǵynyń saldarynan qıyndyq kórip otyr. Óıtkeni, jaıylym men shabyndyqqa sý shyqpaı, tórt túliktiń jaǵdaıy qıyndaǵan.
Odan bólek, Kaspıı teńizi deńgeıiniń tómendeýine baılanysty qalyptasqan qıyndyqtar da aıtyldy.
Májilis depýtattary atalǵan máselelerdiń oń sheshilýine kúsh salatyndaryn jetkizdi.
Odan ári depýtattar Janbaı aýylyna arnaıy at basyn buryp, turǵyndarmen kezdesti. Janbaılyqtar ózderin tolǵandyrǵan túıtkildi máselelerin ortaǵa saldy.
Halyq qalaýlylary ár máseleniń ýaqytyly sheshiletinin aıtty.