Májilis depýtattary Almatydaǵy tártipsizdik kezinde zardap shekken kásipkerlermen kezdesti

ALMATY. QazAqparat - Májilis depýtattary Aıdos Sarym, Aıgúl Quspan jáne Juldyz Súleımenova Almaty qalasyna jumys sapary barysynda qańtar aıyndaǵy oqıǵalar kezinde zardap shekken kásipkerlermen kezdesti, dep habarlaıdy QazAqparat tómengi palatanyń baspasóz qyzmetine silteme jasap.

Júzdesý barysynda depýtattar zalaldy óteý boıynsha tólemder men ótemaqyny jedeldetýdiń ózekti máselelerin talqylady.

Osyndaı maroderlerdiń shabýylyna ushyraǵan kásiporyndardyń biri «DasAutoServise» JShS. Avtoservıs ıesi Kırıl Nagıev 6 jyl boıy ǵımaratty jalǵa alyp, avtomobılderdi jóndeýmen jáne avtobólshekterdi satýmen aınalysady.

Bizdiń avtoservısimizde klıentterdiń 9-ǵa jýyq kóligi boldy, barlyǵy órtendi. Olar da tekserýden ótip, zalaldy óteýge ótinish beredi. Biz shyǵyn somasyn tek 40 mln teńgege dáleldeı aldyq, ótinim qazir maquldaý kezeńinde. Barlyq qujattar men dıagnostıkalyq jabdyqtardyń da janyp ketkeniniń saldarynan dáleldeı almaǵanymyz qanshama», - dedi K.Nagıev.

Jappaı tártipsizdik kezinde avtokólikterge qyzmet kórsetý ortalyǵynda bolǵan kólik ıeleriniń ótinishteri elektrondyq platformada jeke tirkelip, qaralýda. Sonymen qatar jappaı tártipsizdik barysynda 2 avtokólik urlanǵan.

Al ǵımarattyń ózine qazirgi ýaqytta qoldanystaǵy parametrlerdi saqtaı otyryp, qaıta qurýǵa arnalǵan jobalyq-smetalyq qujattama ázirlenýde.

Bul jaǵdaıdyń kúrdeliligi nede, munda ıesi bireý, biraq bir bıznes aıasynda 10-nan astam qosalqy jalǵa alýshy jumys isteıdi. Bul keıs boıynsha bizde túsinistik bar, - dedi Aıdos Sarym.

Depýtattar osy atalǵan máselelerdy baqylaýda ustap, qalalyq qyzmetterdiń jumysyn jedeldetýge yqpal etetinderin aıtty.