Májilis depýtattary Almatydaǵy eksportqa baǵyttalǵan kásiporyn jumysymen tanysty
Almatyda Parlament Májilisi tóraǵasynyń orynbasary, «Nur Otan» partııasy fraktsııasynyń jetekshisi Gúlmıra Isımbaeva jáne Májilis depýtattary Gúlnar Iskanova men Olga Shıshıgına Elbasy Joldaýynda aıtylǵan «Innovatsııalyq jáne servıstik sektorlardy damytý» baǵyty boıynsha túsindirme jumystaryn júrgizý maqsatynda «EFKO ALMATY» zaýytynyń jumysymen tanysty.
«EFKO ALMATY» JShS respýblıka aýmaǵyndaǵy iri maı kásiporyndarynyń biri jáne «EFKO» Kompanııasynyń Halyqaralyq Tobyna kiredi.
Kásiporyn ujymymen kezdesý barysynda Gúlmıra Isımbaeva kompanııanyń básekege qabiletti ónim shyǵarý jáne ony syrtqy naryqqa jetkizý boıynsha jetistikterin atap ótti.
- Elbasy óz Joldaýynda basqa álemdik óndirýshilermen básekege qabiletti bolatyn jáne óz ónimderin eksporttaýǵa qabiletti kompanııalar týraly aıtqan bolatyn. Sondyqtan Memleket Basshysynyń qazaqstandyq óndirýshilerdi qoldaýǵa baǵyttalǵan «Bıznestiń jol kartasy» baǵdarlamasyn 2025 jylǵa deıin uzartýy óte mańyzdy. Kelesi jyly ony júzege asyrý úshin 50 mlrd. teńge bólý kózdelgen, - dedi Gúlmıra Isımbaeva.
Óndiristi jańǵyrtýdyń jáne sońǵy birneshe aı ishinde endirilgen jańa tehnologııalardyń arqasynda kásiporyn jergilikti shıkizatty tereń óńdeý negizinde joǵary sapaly maı ónimin shyǵarýdy retke keltire aldy. Kompanııa respýblıkanyń ishki qajettiligin qamtamasyz etýmen qatar, otandyq ónimdi eksportqa shyǵara bastady. Kúrdeli mıkroekonomıkalyq jaǵdaıǵa qaramastan, QR Úkimetiniń qoldaýymen óndiris pen eksport kólemin arttyrýdy josparlap, ol Qazaqstanǵa 2025 jyldarǵa qaraı Ortalyq jáne Orta Azııadaǵy maı óniminiń negizgi jetkizýshisi bolýyna yqpal etpek.
Sapar aıasynda depýtattar «Ulttyq memlekettik ǵylymı-tehnıkalyq saraptama ortalyǵy» AQ-na bardy.