Májilis depýtattary áleýmettik nysandardyń ýaqytynda tapsyrylýyn baqylaýda ustaý qajettigin aıtty

NUR-SULTAN. QazAqparat - Májilis depýtattary – «Nur Otan» partııasy Fraktsııasynyń músheleri Mádı Elýbaev pen ıÝlııa Kýchınskaıa Aqmola oblysynyń Qosshy qalasynda baryp, onyń aldaǵy áleýmettik-eknomıkalyq damýymen tanysty. Shahardaǵy qurylys qarqynyn baǵamdap, jergilikti turǵyndarmen kezdesti.

Depýtattar eń aldymen «Nur Otan» partııasynyń Saılaýaldy baǵdarlamasyn oryndaýdyń Jol kartasyn iske asyrý monıtorıngi sheńberinde Qosshy qalasynda salynyp jatqan 1200 orynǵa shaqtalǵan mekteptiń qurylys barysymen tanysty.

Qurylysy 2019 jyly bastalǵan mektep óz merziminen jarty jylǵa jýyq ýaqyt keshiktirilip tapsyrylmaq. Sebebi, qurylys materıaldarynyń qymbattaýy saldarynan jobalyq-smetalyq qujatty qaıta túzetý qajet boldy. Ýaqyt ozdyryp alǵan merdiger endi mektepti naýryzdyń aıaǵynda paıdalanýǵa bermek. Búginde mektepke ishki árleý jumystary júrgizilýde.

Fraktsııa depýtattarynyń aıtýynsha, qurylys materıaldarynyń qymbattaý máselesi óte ózekti. Bul tek Qazaqstanda ǵana emes, jalpy álemdik naryqta da oryn alady, bul syrtqy ekonomıkalyq sebepterge baılanysty.

Búginde Qosshy qalasynda 3 birdeı mekteptiń qurylysy júrýde. Árqaısysy 1200 oryndyq. Onyń ekeýi bıyl tapsyrylady dep josparlansa, 3-mektep 2023 jyly paıdalanýǵa beriledi dep kútilýde. Sóıtip, 3600 oryndyqtyq 3 mekteptiń paıdalanýǵa berilýi 3 aýysymda bilim beretin nysandardyń problemasyn tolyqqandy sheshýge yqpal etpek.

Halyq qalaýlylary bir aýysymda 100 kelýshini qabyldaýǵa qaýqarly jańa emhananyń qurylysymen tanysyp, obektilerdi ýaqytynda tapsyrylýyn baqylaýda ustaý qajettigin alǵa tartty.

Májilismender jergilikti turǵyndarmen kezdesý maqsatynda Qosshy qalasynyń problemalyq máseleleri bar shaǵynaýdandardyń turǵyndarymen kezdesti. «Diamond park» turǵyn úı kesheniniń turǵyndary úılerin zańdastyrý máselesin kóterdi. Aıta keteıik, atalǵan turǵyn úı kesheniniń turǵyndary úıdiń qujattaryn qoldaryna ala almaı otyr. Qurylys kompanııasy men jer ıesiniń ózara kelispeýshiliginiń saldarynan, qarapaıym turǵyndar zardap shegýde.

Qosshy turǵyndary sondaı-aq, úzdigip beriletin aýyz sý máselesin kóterdi. Jergilikti atqarýshy organ ókilderiniń aıtýynsha, qoldanystaǵy sýmen jabdyqtaý júıesiniń tıisti jumys isteýin qamtamasyz etý maqsatynda Nıjne-Romanovka ken ornynan Qosshy qalasyna deıin sý tartý qurylystary men sý tartqyshtyń qurylysy aıaqtalýda. Sondaı-aq Qarajar aýylynyń sorǵy stantsııasynan Qosshy qalasyna deıin sý tartqyshtyń qurylysyna jobalaý-smetalyq qujattama ázirlenýde. Demek, jyl sońyna deıin qosshylyqtarǵa sý úzdiksiz beriletin bolady dep kútiledi.