Májilis tsıfrlyq aktıvter týraly qujatty maquldady
Zań jobasy Qazaqstan Respýblıkasynyń aýmaǵynda tsıfrlyq aktıvter naryǵyn damytýǵa, tsıfrlyq aktıvterdi shyǵarý, ornalastyrý jáne aınalysqa shyǵarý protsesindegi qatynastardy retteýge baǵyttalǵan, sondaı-aq tsıfrlyq aktıvter naryǵy sýbektileriniń qyzmetin retteýdiń erekshelikterin qamtyp otyr.
Atalǵan zań jobasy Májiliste 2022 jylǵy 12 qazanda birinshi oqylymda maquldandy.
«Maınıngti jáne onyń ónimin retteýge toqtalsam, maınıngti lıtsenzııalaý eki sanat boıynsha júrgizilmek. Birinshi sanat - tıisti ınfraqurylymy bar tsıfrlyq maınerler. Ekinshi sanatqa derekterdi óńdeý ortalyqtarynda oryndy jalǵa alatyn jáne energııa kvotasyn talap etpeıtin tsıfrlyq maınerler jatady. Zań jobasy mindetti akkredıtteýden basqa, maınıng-pýldar úshin jekeleı talaptar engiziledi. Osy oraıda aqparattyq qaýipsizdik erejelerin saqtaý turǵysynan bólek talaptar qarastyrylǵan», - dedi Májilis depýtaty Ekaterına Smyshlıaeva.
Onyń aıtýynsha, qazaqstandyq qarjy júıesiniń qaýipsizdigin saqtaý maqsatynda tsıfrlyq aktıvter tólem quraly, qarjylyq aktıv jáne qarjy quraly retinde tanylmaıdy.
Qazaqstandyq maınerler tabystarynan korporatıvtik tsıfrlyq salyq tóleıdi, al jeke tulǵalar úshin krıptovalıýta operatsııasyn júzege asyrý kezinde onyń qunynyń ósýine qaraı salyq paıda bolady.
Sonymen qatar depýtat Qazaqstan aýmaǵynda krıptovalıýta aınalymyna jáne krıptobırjalardyń qyzmetine tyıym salynatynyn aıtty. Olar AHQO-nyń jeke ıýrısdıktsııasyndaǵy lıtsenzııa boıynsha ǵana eksperıment retindegi quqyqtyq rejımde jumys isteıdi. El aýmaǵynda krıptovalıýtalyq operatsııalardy jarnamalaýǵa tyıym salynǵan, baǵaly qaǵazdarǵa uqsas qamtamasyz etilgen aktıvter úshin ony retteýdiń erekshe tártibi engizilgen.