Májilis «Baıqońyr» aılaǵynan ǵarysh apparattaryn ushyrýǵa qatysty qujatty maquldady

NUR-SULTAN. QazAqparat – Parlament Májilisiniń jalpy otyrysynda «QR Úkimeti men RF Úkimeti arasyndaǵy polıar mańyndaǵy orbıtalarǵa soltústik baǵytta ǵarysh apparattaryn ushyrý úshin «Baıqońyr» ǵarysh aılaǵynan «Soıýz-2» tıpindegi tasymaldaǵysh zymyrandardy ushyrýdy júzege asyrý jónindegi yntymaqtastyq týraly kelisimdi ratıfıkatsııalaý týraly» zań jobasy maquldandy, dep habarlaıdy QazAqparat tilshisi.

Kelisimge 2019 jylǵy 20 maýsymda Nur-Sultan qalasynda qol qoıyldy.

«Osy kelisim búkil álemdi keń jolaqty ınternetpen qamtamasyz etýge baǵyttalǵan OneWeb halyqaralyq jobasyn júzege asyrý úshin «Baıqońyr» aılaǵynan ǵarysh apparattaryn ushyrý kezinde Qostanaı oblysynyń aýmaǵynda «Soıýz-2» tıpindegi tasymaldaǵysh zymyrandardyń bólinetin bólikteriniń qulaý aýdanyn Reseı tarapymen paıdalaný tártibin retteıdi. Qulaý aýdany jylyna nebári birneshe ret servıtýt shartymen qoldanylyp otyratyn bolady. 3-6 táýlikti quraıtyn bul kezeńde adamdar men úı malynyń qaýipsizdigin qamtamasyz etý maqsatynda qulaý aýdanyna kirý jabyq bolady. Qalǵan ýaqytta qulaý aýdanynda júrýge jáne ony jaıylym retinde paıdalanýǵa shekteý qoıylmaıdy. Adamdardyń qulaý aýdanynan tysqary jerlerde turýy qaýipsiz bolyp sanalady», - dedi QR Tsıfrlyq damý, ınnovatsııalar jəne aeroǵarysh ónerkəsibi mınıstri Baǵdat Mýsın.

Onyń aıtýynsha, kelisimdi ratıfıkatsııalaý «Baıqońyr» kesheni boıynsha qazaqstandyq-reseılik yntymaqtastyqty keńeıtýge, «Baıqońyr» kesheniniń barlyq turmys-tirshiligine oń áserin tıgizip, ǵarysh aılaǵy júktemesin ulǵaıtýǵa múmkindik beredi. «Soıýz-2» tasymaldaǵysh-zymyrany ekologııalyq qaýipsiz kerosın-ottegi otynymen ushyrylady.

«Kelisim sharttaryna sáıkes tasymaldaǵysh-zymyrandardyń bólinetin bólikterin qabyldaý aýdandaryndaǵy ekologııalyq jaǵdaıǵa monıtorıng júrgizýge qazaqstandyq mamandar men uıymdar qatysady jáne baqylaıdy», - dedi mınıstr.

Onyń sózine qaraǵanda, Reseı tarapymen osy kelisimniń kúshine enýi týraly ishki memlekettik rásimderi oryndaldy.