Májilis básekelestik jónindegi zań jobasyn maquldady

ASTANA. 24 qazan. QazAqparat -  Búgin QR Parlamenti Májilisiniń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine básekelestik máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldady.

Zań jobasynyń negizgi maqsaty Qazaqstan, Belarýs jáne Reseı arasyndaǵy Biryńǵaı ekonomıkalyq keńistikti qalyptastyrý sheńberinde Keden odaǵyna qatysýshy elderdiń monopolııaǵa qarsy zańnamasyn úılestirý bolyp tabylady. Sonymen qatar, qujat qoldanystaǵy monopolııaǵa qarsy ulttyq zańnamany jetildirýdi de kózdeıdi.

«Bul rette «Besekelestik týraly» qoldanystaǵy zańǵa eki jańa uǵym: «janama baqylaý» jáne «tikeleı baqylaý» uǵymy engiziledi. Atalǵan uǵymdardy engizýge baılanysty aralarynda tikeleı nemese janama baqylaý belgilengen naryq sýbektileriniń kelisimderi básekelestikke qarsy bolyp sanalmaıdy», - deıdi zań jobasy boıynsha baıandaǵan Ekonomıkalyq damý jáne saýda mınıstri Erbolat Dosaev.

 Budan bólek, zań jobasymen Qazaqstan, Belarýs jáne Reseı arasyndaǵy Biryńǵaı ekonomıkalyq keńistiginiń normatıvtik-quqyqtyq bazasyn qalyptastyrý sheńberinde monopolııaǵa qarsy zańnamany úılestirý sharalary da qarastyrylady.

Birinshi oqylymda maquldanǵan zań jobasy ekinshi oqylymǵa ázirleý úshin bas komıtetke tapsyrylady.