Májilis básekelestik máselesine arnalǵan zań jobasyn maquldady

NUR-SULTAN. QazAqparat – Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine básekelestikti damytý máseleleri boıynsha ózgerister men tolyqtyrýlar engizý týraly» zań jobasy ekinshi oqylymda qaralyp, maquldandy, dep habarlaıdy QazAqparat tilshisi.

Zańynyń jobasy memlekettiń kásipkerlikke qatysýyn qysqartýǵa, kásipkerlik sýbektileriniń memlekettik qoldaý sharalaryna teń qol jetkizýin qamtamasyz etýge, taýar naryqtaryndaǵy naryqtyq shoǵyrlaný deńgeıin tómendetýge, shaǵyn jáne orta kásipkerlikti damytýǵa, sondaı-aq taýar naryqtaryna kirý úshin ákimshilik jáne ekonomıkalyq kedergilerdi qysqartýǵa baǵyttaldy.

Atalǵan zań jobasy 2021 jylǵy 3 qarashada birinshi oqylymda maquldandy.

Jumys tobynyń zań jobasymen jumys isteýi barysynda depýtattar:

- ústem nemese monopolııalyq jaǵdaıǵa ıe naryq sýbektileriniń negizgi qýatyna naryq sýbektileriniń teń qol jetkizýin qamtamasyz etýge baılanysty normalardy naqtylaý;

- memlekettik tapsyrmalardy bólý úshin negizdemelerdiń tolyq tizbesin, sondaı-aq tapsyrystardy memlekettik tapsyrmalar tizbesine engizý úshin ólshemsharttardy belgileý;

- memlekettik jáne jekemenshik operatorlardyń qyzmetin zańnamalyq retteý;

- memlekettik qoldaý sharalaryn kórsetetin tulǵalar qyzmetiniń monıtorıngin júzege asyrý jónindegi monopolııaǵa qarsy organnyń quzyretterin naqtylaý bóliginde túzetýler engizdi.

Májilis depýtaty Samat Aqyshevtyń aıtýynsha, budan basqa, Qazaqstan Respýblıkasynyń qoldanystaǵy zańnamasyna jáne zań tehnıkasynyń talaptaryna sáıkes keltirý, sondaı-aq zań jobasynyń jekelegen normalaryn naqtylaıtyn jáne mazmunyn jaqsartatyn túzetýler engizildi.

Parlament Májilisiniń barlyq komıteti zań jobasy boıynsha oń qorytyndylar berdi.