Májilis atqarýshylyq is júrgizýdi jetildirýge baǵyttalǵan zań jobasyn birinshi oqylymda maquldady

NUR-SULTAN. QazAqparat – QR Parlament Májilisi atqarýshylyq is júrgizýdi jetildirýge baǵyttalǵan zań jobasyn birinshi oqylymda maquldady, dep habarlaıdy QazAqparat tilshisi.

«Qazaqstan Respýblıkasynyń keıbir zańnamalyq aktilerine atqarýshylyq is júrgizýdi jetildirý máseleleri boıynsha ózgerister men tolyqtyrýlar engizý týraly» QR Zańynyń jobasyn áriptesterine Májilis depýtaty Dmıtrıı Koloda tanystyrdy.

Qujatta atqarýshylyq is júrgizý máseleleri boıynsha zańnamalyq aktilerdegi olqylyqtardy, kollızııalar men qaıshylyqtardy, sondaı-aq sybaılas jemqorlyq kórinisterine yqpal etetin normalardy joıý kózdeledi.

Májilistiń Zańnama jáne sot-quqyqtyq reforma komıtetiniń tóraǵasy Arman Qojahmetovtiń aıtýyna qaraǵanda, zań jobasyn qabyldaý birneshe máseleni sheshýge múmkindik beredi.

Olar:

- jeke sot oryndaýshylarynyń atqarýshylyq is júrgizýdi aıaqtaǵan kezde aldyńǵy jeke sot oryndaýshylary shyǵarǵan májbúrleý sharalary týraly barlyq qaýlylardyń kúshin joıý mindetin belgileý;

- sybaılas jemqorlyq quqyq buzýshylyqty bolǵyzbaý maqsatynda boryshkerdi shaqyrý negizderin qysqartý;

- jeke sot oryndaýshylarynyń atqarýshylyq is júrgizýdi qozǵaý týraly qaýlynyń kóshirmesin jiberý jáne májbúrlep oryndatý sharalary týraly habar berý jónindegi mindetin belgileý.

Zań jobasy qabyldanǵan jaǵdaıda mynadaı oń quqyqtyq jáne áleýmettik-ekonomıkalyq saldar kózdeledi:

- atqarýshylyq is júrgizýge qatysatyn azamattar men uıymdardyń quqyqtaryn neǵurlym jaqsy qamtamasyz etý;

- atqarýshylyq is júrgizý máseleleri boıynsha shaǵymdar men ótinishterdiń sanyn azaıtý.

Zań jobasyn depýtattar birinshi oqylymda maquldap daýys berdi.