Májilis asyl tuqymdy mal sharýashylyǵy týraly zań jobasyn maquldady
Búgingi otyrysta «Qazaqstan Respýblıkasynyń keıbir zańnamalyq aktilerine asyl tuqymdy mal sharýashylyǵy máseleleri boıynsha ózgerister men tolyqtyrýlar engizý týraly» QR Zańy jobasy bıylǵy aqpan aıynda birinshi oqylymda maquldanǵan edi.
«Zań jobasynyń birinshi oqylymynda Májilis tóraǵasy bergen tapsyrmaǵa sáıkes, Zań jobasyna asyl tuqymdy mal sharýashylyǵy sýbektileriniń qyzmetin júzege asyrý tásilderin ózgertý, sybaılas jemqorlyq táýekelderin boldyrmaý, aýyl sharýashylyǵy beıinindegi ǵylymı uıymdardyń qyzmetin keńeıtý jáne tutastaı alǵanda ósirilip otyrǵan mal tuqymdarynyń genetıkalyq áleýeti men ónimdiligin arttyrý, olardyń bas sanyn ulǵaıtý maqsatynda selektsııalyq-asyl tuqymdyq jumysty damytý jóninde túzetýler engizildi. Sonymen qatar, zań jobasymen jumys isteý barysynda depýtattar onyń mazmunyn naqtylaýǵa jáne jaqsartýǵa baǵyttalǵan túzetýler engizdi», - dedi Májilis depýtaty, Agrarlyq máseleler komıtetiniń múshesi Asqarbek Úısimbaev Májilistiń jalpy otyrysynda.
Atap aıtqanda, asyl tuqymdy mal sharýashylyǵy salasyndaǵy sýbektiler qyzmetiniń habarlama jasaý tártibi asyl tuqymdy ortalyq, asyl tuqymdy maldyń uryǵy men embrıondaryn ótkizý jónindegi dıstrıbıýterlik ortalyq, bonıter, uryqtandyrýshy-tehnık jáne embrıondardy trasplanttaý jónindegi maman úshin saqtaldy.
Budan basqa, janýarlardyń genomdyq baǵalaýy men molekýlıarlyq-genetıkalyq baǵalaýyn júrgizý jónindegi erejeler reglamenttelgen, bul janýarlardyń negizgi sharýashylyq belgileri boıynsha selektsııany edáýir arttyrýǵa múmkindik beredi.
Maldyń ónimdiligi men asyl tuqymdyq sapasyn arttyrý úshin asyl tuqymdy ónimdi – uryq pen embrıondardy paıdalanýǵa jáne ótkizýge qatysty normalar reglamenttelgen.
Zań jobasynda asyl tuqymdy emes, biraq selektsııalyq protseske tartylǵan jáne asyl tuqymdy istiń damýyna tikeleı áser etetin janýarlardy esepke alý boıynsha da normalar kózdelgen.
«Depýtattar respýblıkalyq palatalardyń qyzmetin jetildirý boıynsha da túzetýler engizdi. Asyl tuqymdy mal sharýashylyǵy salasyndaǵy zańbuzýshylyqtardyń der kezinde jolyn kesý jáne olarǵa jol bermeý úshin ýákiletti organ vedomstvosynyń baqylaý sýbektisine barmaı, profılaktıkalyq baqylaý júrgizý kózdelgen. Respýblıkalyq palatalar da asyl tuqymdy jáne dıstrıbıýterlik ortalyqtar, bıýdjettik sýbsıdııalar alǵan jeke jáne zańdy tulǵalarmen qatar profılaktıkalyq baqylaý sýbektileri bolyp sanalady. Májilistiń barlyq komıteti osy zań jobasy boıynsha oń qorytyndy berdi. Komıtetiń eki keńeıtilgen otyrysy jáne múddeli ýákiletti organdar, úkimettik emes uıymdar men aýyl sharýashylyǵy taýaryn óndirýshiler ókilderiniń qatysýymen jumys tobynyń 28 otyrysy ótti. Salystyrma keste qabyldanǵan 106 pozıtsııadan turady. Agrarlyq máseleler jónindegi komıtet bul zań jobasyn ekinshi oqylymda maquldap, ony Parlament Senatyna qaraýǵa jiberýge bolady dep esepteıdi», - dedi A. Úısimbaev.
Depýtattar túgel zań jobasyn maquldap daýys berdi.