Májilis Armenııanyń Premer-Mınıstrine qatysty qujatty maquldady

ASTANA. QazAqparat - Parlament Májilisiniń jalpy otyrysynda «2014 jylǵy 29 mamyrdaǵy Eýrazııalyq ekonomıkalyq odaq týraly shartqa ózgeris engizý týraly hattamany ratıfıkatsııalaý týraly» zań jobasy maquldandy, dep habarlaıdy QazAqparat.

2015 jylǵy 6 jeltoqsanda Armenııada konstıtýtsııalyq referendým ótip, nátıjesinde, prezıdenttik basqarý túri parlamenttik basqarý túrine ózgergeni belgili.

«Qabyldanǵan ózgeristerge sáıkes, 2018 jyly sáýirden bastap Armenııanyń Premer-Mınıstri eldiń joǵary laýazymdy tulǵasy boldy. Osy el Premer-Mınıstri ókildikterine syrtqy saıasat máseleleri de jatady, ol memlekettik qaýipsizdik keńesin basqarady. Qarýly kúshter Úkimetke baǵynady. Armenııa Prezıdentinde qazir shektelgen ókildik qyzmetteri bar. Bul elde aıaqtalǵan saıası reformany eskere otyryp, Joǵary Eýrazııalyq ekonomıkalyq keńestiń quramyna múshe memleketterdiń basshylarymen qatar, úkimet basshynyń kirýin retteý maqsatynda atalǵan hattamany Eýrazııalyq ekonomıkalyq komıssııa múshe memlekettermen birlesip ázirledi», - dedi QR Syrtqy ister mınıstri Qaırat Ábdirahmanov.