Májilis aktıvterdi memleketke qaıtarý jónindegi zańdy qabyldady

ASTANA. QazAqparat – Búgin Májilistiń jalpy otyrysynda «Zańsyz alynǵan aktıvterdi memleketke qaıtarý týraly» Zańy men úsh ilispe qujat ekinshi oqylymda qaralyp, qabyldandy, dep habarlaıdy QazAqparat tilshisi.

«Qujattardyń negizgi maqsaty - zańsyz alynǵan jáne shyǵarylǵan aktıvterdi izdeýge (ashyp kórsetýge), memleketke qaıtarý boıynsha sharalar qabyldaýǵa baılanysty qoǵamdyq qatynastardy retteý.

«Zań jobalary aıasynda zańsyz ıemdengen jáne shyǵarylǵan aktıvterdi memleketke qaıtarý, aktıvterdi erikti túrde qaıtarýǵa yntalandyrý, aktıvterdi zańsyz ıemdenýge yqpal etken sebepter men jaǵdaılardy joıý arqyly qoǵamdaǵy áleýmettik ádilettilikti qalpyna keltirý, Qazaqstan halqynyń ál-aýqatyn arttyrý sekildi jaǵymdy áleýmettik-ekonomıkalyq tustary bar», - dedi Májilis depýtaty Snejanna Imasheva.

Onyń aıtýynsha, jumys tobynyń otyrystarynda qaraý barysynda negizgi zań aıasynda tıisti túzetýler engizildi. Bul turǵyda zańnyń qoldanylý aıasyn naqtylaýǵa, aktıvterdi qaıtarý jónindegi ýákiletti organnyń quzyretine, vedomstvoaralyq ózara is-qımyl jasaýǵa, Komıssııanyń quramy men fýnktsııalaryn qalyptastyrý tártibine, tizilimdi qalyptastyrý tártibine, aktıvterdi ashyp kórsetý týraly deklaratsııany jáne oǵan qosa beriletin málimetterdi qaraý kezinde Komıssııanyń quzyretine, aktıvterdi erikti túrde qaıtarýǵa, qatysty redaktsııalar túzetildi.

Sonymen qatar, «paıda bolýy túsiniksiz aktıvter», «jaýapty memlekettik laýazym atqaratyn adam», «ústeme kiris» degen uǵymdar naqtylandy. Munymen qosa, «ákimshilik-bılik resýrstary» degen jańa uǵym eńgizildi.

Іlispe zańdar boıynsha:

- Bas prokýratýra janynan aktıvterdi qaıtarý jónindegi jańa vedomstvo qurýǵa baılanysty prokýratýra organdarynyń aktıvterdi qaıtarý jónindegi vedomstvosynyń basshysyna jáne onyń orynbasarlaryna «prokýror» mártebesin berýge;

- Joǵary aýdıtorlyq palataǵa jergilikti bıýdjettiń tıimdiligi men sáıkestigine aýdıt júrgizý boıynsha jańa ókilettikter berýge;

- Qylmystyq kodekstiń jańa 235-1-baby boıynsha asa iri zalaldyń mólsherin nemese asa iri mólsherdi, iri zalaldyń mólsherin nemese iri mólsherdi anyqtaýǵa;

- qylmystyq zańnyń sheteldikterge qatysty qoldanylýyn naqtylaýǵa baılanysty túzetýler engizildi.

Budan buryn habarlanǵandaı, Bas prokýratýranyń qurylymynda zańsyz shyǵarylǵan aktıvterdi qaıtarý jónindegi jeke vedomstvo qurylady. Ol osy saladaǵy ýákiletti organnyń fýnktsııalaryn oryndaıdy.