Majarstanmen alys-beris qolda bar áleýetke saı emes – Memleket basshysy

<p>Qazaqstan men Majarstan arasyndaǵy taýar aınalymynyń kólemi qolda bar áleýetke sáıkes emes. Memleket basshysy Qasym-Jomart Toqaev Majarstan Premer-Mınıstri Vıktor Orbanmen kezdesý qortyndysynda osyndaı pikir aıtty, dep habarlaıdy <a href="https://kaz.inform.kz/" target="_blank" rel="noopener">Kazinform</a> agenttigi.</p>

«Biz tet-a-tet formatynda halyqaralyq kún tártibindegi ózekti máseleler jóninde jemisti pikir almastyq. Talqylaýlar konstrýktıvti boldy. Elderimizdiń arasyndaǵy taýar aınalymyn arttyrý úshin qosymsha qadamdar jasaýymyz kerek degen ortaq paıymǵa keldik. Osyǵan baılanysty sizge eki aradaǵy saýda aınalymyna tyń serpin berý úshin úkimetke tıisti shara qabyldaýdy tapsyrsańyz degen ótinishim bar. Óıtkeni qazirgi deńgeı ekonomıkamyzdyń áleýetine sáıkes kelmeıdi. Jalpy Qazaqstan men Majarstan arasyndaǵy áriptestiktiń betalysy óte jaǵymdy, qol jetken nátıjeler barshylyq», — dedi Memleket basshysy.

Buǵan deıin Aqordada Majarstan Premer-Mınıstrin qarsy alý saltanaty ótkenin jazǵan edik.

Qasym-Jomart Toqaev Vıktor Orbanmen kezdesý kezinde eki eldiń baýyrlastyq baılanysy týraly aıtty.

«Qazaqstan sizdiń atamekenińiz dep aıtýǵa bolady. Sebebi tamyryńyz osy jerden bastaý alady. Ózińiz qypshaqtarǵa óte jaqynsyz. Bul derekti qazaqtar jaqsy biledi. Sizdiń saparyńyz óte mańyzdy. Eki el arasyndaǵy yntymaqtastyqqa kúshti serpin beredi dep senemiz. Qazaq pen majar — ejelden syılastyǵy jarasqan týys halyqtar. Eki eldiń tili, salt-dástúri, mádenıeti uqsas. Orta ǵasyrlarda Torǵaı dalasynan Eýropaǵa qonys aýdarǵan qypshaq taıpalarynyń urpaqtary búginde Majarstan aýmaǵynda ómir súrip jatyr. Biz muny maqtan tutamyz. Tarıhı tamyrlastyq jáne tyǵyz baılanystar búginde eki el arasyndaǵy yntymaqtastyqtyń tereńdeı túsýine negiz boldy. Birlesken kúsh-jigerimizdiń arqasynda qazaq-majar yqpaldastyǵy barlyq salada qarqyndy damydy», — dedi Memleket basshysy.

Eske salsaq, keshe keshke Vıktor Orbandy Astana áýejaıynda vıtse-premer Serik Jumanǵarın kútip alǵan bolatyn.

Qazaqstan basshylyǵymen kelissóz barysynda Qazaqstan men Majarstan arasyndaǵy saýda-ekonomıkalyq, ınvestıtsııalyq jáne mádenı-gýmanıtarlyq salalardaǵy yntymaqtastyqty odan ári tereńdetý máseleleri talqylanady dep josparlanyp otyr.

Aıta ketý kerek, Astanada Túrki memleketteri uıymynyń H sammıti ótedi.

Oǵan Ázerbaıjan, Qyrǵyzstan, Túrkııa, Ózbekstan prezıdentteri, baqylaýshy memleketter — Majarstan men Túrikmenstan basshylary qatysady.