Majarstanǵa mal ónimderin kóbirek satsaq dep otyrmyz – Serik Jumanǵarın

<p>Memleket basshysy Qasym-Jomart Toqaev pen Majarstan Premer-Mınıstri Vıktor Orbannyń Aqordadaǵy kezdesýi aldynda Úkimet basshysynyń orynbasary Serik Jumanǵarın BAQ ókilderine eki el arasyndaǵy alys-beristiń aýqymy týraly málimet berdi, dep habarlaıdy <a href="https://kaz.inform.kz/" target="_blank" rel="noopener">Kazinform</a> agenttigi.</p>

«Byltyr Majarstanmen aradaǵy taýar aınalymynyń kólemi 100 mln AQSh dollary boldy. Bıylǵy toǵyz aıda 24 paıyzǵa ósti, taǵy da ósýi múmkin. Onyń kóbi - Majarstannan keletin ımport. Dári-dármek, kókónis, kóbi taǵam. Sapasy óte joǵary. Biz ne aparamyz desek, bıyl balyq jetkizýdi bastadyq. Bıyl kólemi eki ese kóbeıdi. Buryn 67 tonna bolsa, qazir 120 tonna jiberdik. Jalpy Eýropaǵa balyq eksportyn bıyl ashtyq deýge bolady. Sony búgin talqylaımyz», - dedi Serik Jumanǵarın.

Onyń aıtýynsha, eki aradaǵy saýda-sattyqtyń aıasyn keńeıtýge múmkindik beretin taýarlardyń tizimi aıqyndalǵan.

«Ókinishke qaraı eki el arasyndaǵy saýda aınalymy biz qalaǵandaı aýqymdy emes. Biraq óte jyldam ósip keledi. Jyl saıyn 25 paıyz artyp jatyr. Eksport sonsha úlken emes. Birinshi kezekte mal sharýashylyǵynyń óniminiń eksportyn arttyrýymyz kerek», - dedi vıtse-premer.

Eske salsaq, keshe keshke Vıktor Orbandy Astana áýejaıynda Premer-Mınıstrdiń orynbasary Serik Jumanǵarın kútip alǵan bolatyn.

Qazaqstan basshylyǵymen kelissóz barysynda Qazaqstan men Majarstan arasyndaǵy saýda-ekonomıkalyq, ınvestıtsııalyq jáne mádenı-gýmanıtarlyq salalardaǵy yntymaqtastyqty odan ári tereńdetý máseleleri talqylanady dep josparlanyp otyr.

Aıta ketý kerek, Astanada Túrki memleketteri uıymynyń H sammıti ótedi.

Oǵan Ázerbaıjan, Qyrǵyzstan, Túrkııa, Ózbekstan prezıdentteri, baqylaýshy memleketter – Majarstan men Túrikmenstan basshylary qatysady.