Majarstandaǵy qazaqstandyqtar Naýryz meıramyn atap ótti

ASTANA. QazAqparat – Qazaqstannyń Majarstandaǵy Elshiligi «Bars» qazaq-majar qorymen birlesip Naýryz meıramyna arnalǵan is-shara uıymdastyrdy, dep habarlaıdy QR SІM baspasóz qyzmeti.

Mádenı is-sharaǵa qazaq dıasporasy men qazaqstandyq stýdentter, «Madıar-Turan» qoǵamdyq qorynyń ókilderi, Majarstannyń ǵylym jáne mádenıet qaıratkerleri, sondaı-aq isker toptarynyń ókilderi qatysty.

Mereıtoıdy ashqan Qazaqstan Elshisi Jánibek Ábdrashov Naýryz merekesi ulttyq biregeılikti saqtaý, beıbitshilik pen dostyqty nyǵaıtý turǵysynan mańyzdy ekenin atap ótip, qazaqtyń ulttyq salt-dástúrleri, mádenıeti, ulttyq rýhy bizben máńgi birge bolýǵa tıis ekenin aıtyp, baqyt pen amandyq tiledi.

Qordyń prezıdenti Andrash Gal men Abaı ortalyǵynyń basshysy Ońǵaısha Mandokı óz sózderinde eki eldiń halyqtaryn jaqyndastyratyn ortaq tamyrlar men tarıh ózara tıimdi qyzmet úshin mańyzdy negiz bolyp tabylatynyn atap ótti.

Kórermenderge qazaq halqynyń ulttyq salt-dástúrleri kórsetilgen jarqyn shyǵarmashylyq nómirler usynyldy. Qazaq dıasporasy men stýdentter arasynda kóptegen talanttar mýzykalyq nómirlerde jarq etti. Naýryz merekesi kóńildi ándermen, bılermen jáne mýzykalyq aspaptarda oınaýmen súıemeldendi. «Eń myqty batyr» degen dástúrli baıqaý da uıymdastyryldy.

Іs-sharanyń basty ereksheligi «Turan» etno-folklorlyq ansambliniń qoıylymy boldy. Ulttyq aspaptardyń áýeni kórermenderdi Uly dalanyń sheksiz keńistigine jeteledi.

Qonaqtarǵa arnalǵan alýan kontserttik baǵdarlamadan basqa merekelik dastarhan jaıylyp, qonaqtardyń áserlerin tolyqtyrdy. Barlyq qatysýshylarǵa dástúrli qazaq jáne majar taǵamdary – palaý, gýlıash, paprıkash, baýyrsaq jáne táttiler usynyldy.