Majarstanda «Turan» halyqtarynyń quryltaıy ótýde
Sharaǵa 30-dan astam el men halyqtyń delegatsııalary qatysty. Quryltaı «Turan» ejelgi jaýyngerleri sherýiniń jańartylǵan saltanatymen ashyldy. Halyqaralyq sharaǵa qatysýshylar aldynda Vengrııa Parlamentiniń sıpkeri Laslo Kever sóz sóıledi. Al Aqtóbe oblysynyń ákimi Berdibek Saparbaev óz quttyqtaýynda osynaý qyzyqty ári joǵary deńgeıde uıymdastyrylǵan sharaǵa uıytqy bolǵandarǵa rızashylyǵyn bildirdi.
Sonymen qatar Berdibek Saparbaev quryltaıǵa Qazaqstan Prezıdentiniń tapsyrmasymen kelgenin aıtty. Qazaqstan men Majarstan arasyndaǵy tarıhı, mádenı jáne ekonomıkalyq baılanystardyń jyldan jylǵa tereńdep, nyǵaıa túsip kele jatqandyǵyn atap ótti. Oǵan Qazaqstan Prezıdenti Nursultan Nazarbaevtyń Majarstanǵa jáne eldiń Premer-Mınıstri Vıktor Orbannyń Astanaǵa sapary jarqyn dálel bola alady.
Munan bólek, Aqtóbe oblysynyń ákimi Qazaqstanda Túrkistan oblysynyń qurylǵanyn, ol tarıhı týrızm bazasyn qurý úshin úlken múmkinshilikter ashatyndyǵyn jáne «Turan» halyqtary quryltaıyna qatysýshylardyń da qyzyǵýshylyǵyn týdyratyndyǵyn aıtty.
B.Saparbaev Qazaqstanda ǵundardyń tarıhyn, óneri men mádenıetin zertteý ortalyǵynyń qurylǵandyǵyn atap ótti. Sonymen qatar qatysýshylardy kelesi jyly Qazaqstanda quryltaı ótkizýge shaqyrdy. Sóz sońynda «Madııar Turan» qoryna Aqtóbe oblysynyń atynan qazaqtyń kıiz úıin tartý etti.
Quryltaı aıasynda dóńgelek ústel ótip, oǵan Halyqaralyq túrki akademııasynyń prezıdenti Darhan Qydyráli, «Sakraldy Qazaqstan» ǵylymı-zertteý ortalyǵynyń jetekshisi Berik Ábdiǵalıuly, L.Gýmılev atyndaǵy Eýrazııa ulttyq ýnıversıtetiniń professory Aıbolat Kóshkinbaev qatysty. Onda Túrki akademııasynyń, sondaı-aq «Sakraldy Qazaqstan» ortalyǵynyń tanystyrylymy boldy. «Sakraldy Qazaqstan» «Rýhanı jańǵyrý» baǵdarlamasy aıasynda júzege asyrylýda.
Darhan Qydyráli majarlyq sarapshylar men ǵalymdardy «Shıveet Ýlaan» (Mońǵolııa - avt.) jerindegi birinshi túrki ǵıbadathanasynyń ornynda júrgizilgen sońǵy qazba jumystarynyń nátıjelerimen tanystyrdy. Al Berik Ábdiǵalıuly «Sakraldy Qazaqstan» kitabyn tanystyryp, Bozaq qalashyǵy jáne onyń ǵundarmen baılanys jaıynda keńinen sóz qozǵady.
«Turan» halyqtary quryltaıshysynyń negizin qalaýshy jáne ıdeıalyq shabyttandyrýshy Andrash Bıro Halyqaralyq túrki akademııasynyń altyn medalimen marapattaldy.
Dóńgelek ústel aıasynda Halyqaralyq túrki akademııasy men «Madııar Turan» qory yntymaqtastyq týraly memorandýmǵa qol qoıdy.
Quryltaı jumysy eki kúnge jalǵady. Onda «Turan» tarıhı aýmaǵyn qamtıtyn halyqtardyń baı tarıhı-mádenı murasy usynylady.